އީރާނާއި ދެކޮޅަށް ހަނގުރާމަ ކުރުމަށް ޓަކައި ޔުނައިޓެޑް އަރަބް އެމިރޭޓްސް އިން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އެހީތެރިކަން ހޯދިކަން ފަޅާއަރައިފިއެވެ.

ބައެއް މަސްދަރުތައް ބުނާ ގޮތުގައި އިސްރާއީލުގެ ސިފައިން ވަނީ ޔޫއޭއީގައި ތިބެގެން އީރާނަށް ހަމަލާ ދީފައެވެ.

ޔޫއޭއީން އެދުނީ އީރާނުން ފޮނުވާ ހަމަލާތަކުން ތިމަންނާމެން ރައްކާތެރި ކުރުމަށް ޓަކައި އިޒުރޭލުގެ ޒައެނިސްޓް ސިފައިން ފޮނުވައިދިނުމަށެވެ. އެއާއި އެކު ނަތަންޔާހޫ ވަނީ އޭނާގެ އަސްކަރިއްޔާގެ ސިފައިން ޔޫއޭއީ އަށް ފޮނުވާފައެވެ. އެކަން އެމެރިކާ އިން މިހާރު ވަނީ ރަސްމީކޮށް ކަށަވަރުކޮށްދީފައެވެ.

އެމެރިކާ އާއި އިސްރާއީލުގެ އޮފިޝަލުންގެ ރިޕޯޓްތައް ބުނާ ގޮތުގައި ޔޫއޭއީގެ ތެރޭގައި އެ ނިޒާމުތައް ހިންގުމަށް އިސްރާއީލުގެ "އެތައް ސަތޭކަ" ސިފައިންނާއި އެކު އަޔަން ޑޯމްގެ ވައިގެ ދިފާއީ ބެޓެރީތައް ވެސް ފޮނުވިއެވެ.

އިސްރާއީލުގައި ހުންނަވާ އެމެރިކާގެ ސަފީރު މައިކް ހަކަބީ ވަނީ ޔޫއޭއީ ދިފާއު ކުރުމަށް އެހީތެރިވުމަށް އިސްރާއީލުން “އަޔަން ޑޯމް ބެޓެރީތަކާއި މުވައްޒަފުން” ފޮނުވާފައިވާކަން އާންމުކޮށް ކަށަވަރުކޮށްދެއްވާފައެވެ. ޔޫއޭއީއަށް އަމާޒުކޮށްގެން އީރާނުގެ މިސައިލްތައް ހުއްޓުވުމަށް އެ ނިޒާމު ބޭނުންކުރި ކަމަށް ވެސް އދ.ގައި ހުންނަވާ އެމެރިކާގެ ސަފީރު މައިކް ވޯލްޓްޒް ވަނީ ކަށަވަރުކޮށްދީފަ އެވެ.

ބައެއް މަސްދަރުތައް ބުނާ ގޮތުގައި އިސްރާއީލު ސިފައިން ތިބީ އަޔަން ޑޯމް ސިސްޓަމްތައް ހިންގާ އެއާ ޑިފެންސް ލޮކޭޝަންތަކުގެ ކައިރީގައެވެ. ނަމަވެސް އެމީހުން ތިބި ތަންތަން ވަނީ ސިއްރު ކޮށްފައެވެ.