އެމެރިކާއާއި އީރާނުގެ ސިފައިންގެ ދެމެދުގައި ހަމަލާތަކެއް ބަދަލުކުރެވުނު ނަމަވެސް، ދެ ގައުމުގެ ދެމެދުގައި އޮތް ހަމަލާބަދަލުކުރުން ހުއްޓާލުމުގެ އެއްބަސްވުމަށް ބަދަލެއް ނާންނަ ކަމަށާއި އެ އެއްބަސްވުން އަދިވެސް ދެމިއޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ޓްރަމްޕް މިހެން ބުނީ، ދެ ގައުމުގެ ދެމެދުގައި އުފެދިފައިވާ ނުތަނަވަސްކަން އިތުރަށް ގޯސްވެ، އަލުން ހަނގުރާމައެއް ފެށިދާނެ ކަމުގެ ބިރު ބޮޑުވެފައިވާ ދަނޑިވަޅެއްގައެވެ.
ޓްރަމްޕް އިތުރަށް ބުނި ގޮތުގައި، އެމެރިކާއިން ބޭނުންވަނީ ސަރަހައްދީ މަސްލަހަތު ހިމާޔަތްކުރުމަށެވެ. އަދި އީރާނާއެކު ވެފައިވާ އެއްބަސްވުމާ އެއްގޮތަށް ކުރިއަށް ދިއުމަށް އެމެރިކާ ތައްޔާރަށް އޮތް ނަމަވެސް، އެމެރިކާގެ މަސްލަހަތުތަކަށް ގެއްލުންދޭ ކޮންމެ ހާލަތެއްގައި ރައްދު ހަމަލާ ދޭނެ ކަމުގެ އިންޒާރުވެސް އޭނާ ވަނީ ދީފައެވެ.
