އެމެރިކާއާއި އީރާނާ ދެމެދު ބޭއްވުމަށް ހަމަޖެހިފައި އޮތް ސުލްހައިގެ ވާހަކަތަކުގެ ދެވަނަ ބުރު ކުރިއަށް ނުގެންދެވި ހުއްޓުމަކަށް އައުމާ ގުޅިގެން، އޭޝިއާގެ ބާޒާރުތަކުގައި މިއަދު ހެނދުނު ތެލުގެ އަގު އުފުލިއްޖެއެވެ.
ދުނިޔޭގެ ބާޒާރުގައި ތެލުގެ އަގު ހުރިގޮތަށް ބަލާއިރު، ބްރެންޓް ކުރޫޑްގެ އަގު %1 އުފުލި، ފީފާއެއްގެ އަގު މިހާރު ހުރީ 106.50 ޑޮލަރުގައެވެ. މީގެ އިތުރުން އެމެރިކާގެ ބާޒާރުގައި ވިއްކާ ތެލުގެ އަގުވެސް ވަނީ %1 އުފުލި، ފީފާއެއް 95.40 ޑޮލަރަށް އަރާފައެވެ.
ތެލުގެ އަގަށް މި ބަދަލު އައީ، އީރާނާއެކު މަޝްވަރާ ކުރުމަށް ޕާކިސްތާނަށް ވަފުދެއް ފޮނުވުމަށް އެމެރިކާއިން ރާވާފައި އޮތް ރޭވުންތައް ކެންސަލް ކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު އިއުލާނު ކުރެއްވުމާ ގުޅިގެންނެވެ. ޓްރަމްޕް ވިދާޅުވި ގޮތުގައި ޕާކިސްތާނުގެ އިސްލާމްއާބާދަށް ވަފުދެއް ފޮނުވުމަކީ "ވަގުތު ބޭކާރުކުރުން" ކަމަށާއި، އީރާނުގެ ލީޑަޝިޕްގެ ތެރޭގައި ބޮޑެތި މައްސަލަތަކާއި އޮޅުންބޮޅުންތަކެއް އެބަހުއްޓެވެ.
Advertisement
"އެމީހުންގެ ކަންކަން ބަލަހައްޓަނީ ކާކުކަމެއް އެމީހުންނަކަށްވެސް ނޭނގޭ. ހުރިހާ ބާރެއް އޮތީ އަހަރެމެންގެ އަތުގައި. އެމީހުން ބޭނުންވަނީ ވާހަކަދައްކަން ކަމަށްވާނަމަ، އޮތީ ހަމައެކަނި ފޯނު ކޯލެއް ކޮށްލުން،" ޓްރަމްޕް ބުންޏެވެ.
އެމެރިކާއާއި އިސްރާއީލުން އީރާނަށް ދިން ހަމަލާތަކަށް ބަދަލުހިފުމުގެ ގޮތުން، އީރާނުން ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހޯރްމޫޒް ކަނޑުއޮޅިން ދަތުރުކުރާ އުޅަނދުތަކަށް ހަމަލާދޭނެ ކަމުގެ އިންޒާރު ދިނުމާއެކު، ދުނިޔޭގެ ތެލުގެ ސަޕްލައިއަށް ވަނީ ބޮޑު ނުތަނަވަސްކަމެއް ކުރިމަތިވެފައެވެ. ދުނިޔޭގައި ބޭނުންކުރާ ތެލާއި އެލްއެންޖީގެ ފަސްބައިކުޅަ އެއްބައި އާންމުކޮށް ދަތުރުކުރަނީ މި ކަނޑުއޮޅި މެދުވެރިކޮށެވެ.
މިދަނޑިވަޅުގައި އީރާނުގެ ޚާރިޖީ ވަޒީރު ސައްޔިދު އައްބާސް އަރަގްޗީ ވިދާޅުވީ، ކަނޑުގެ ދަތުރުފަތުރުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އަވަށްޓެރި އޮމާނާއެކު މުހިންމު މަޝްވަރާތަކެއް ކުރިއަށްދާ ކަމަށެވެ. އަދި އޭނާ މިއަދު ވަނީ ރަޝިޔާގެ ރައީސް ލަޑީމިއަރ ޕޫޓިންއާ ބައްދަލުކުރެއްވުމަށް ސެންޓް ޕީޓަސްބާގަށް ވަޑައިގެންފައެވެ.
ފާހަގަކޮށްލެވޭ ގޮތުގައި، އީރާނުގެ ލީޑަޝިޕަށް ފުރުސަތެއް ދިނުމުގެ ގޮތުން ހަނގުރާމަ ހުއްޓާލުމުގެ މުއްދަތު އިތުރުކުރާނެ ކަމަށް ޓްރަމްޕް މިދިޔަ ހަފުތާގައި ވިދާޅުވި ފަހުން، ބްރެންޓް ކުރޫޑްގެ އަގު މިހާރު ވަނީ %10 އަށްވުރެ ބޮޑަށް އުފުލިފައެވެ.
