ބުޝެހްރު ނިއުކްލިއާ ޕަވަރ ޕްލާންޓުން ރޭޑިއޭޝަން ލީކު ވެއްޖެ ނަމަ ގަލްފް ގައުމު ތަކަށް ވަރަށް ބޮޑަށް އޭގެ އަސަރުކޮށް، ސަރަހައްދީ ކާރިޘާ އެއް ކުރިމަތި ވެދާނެ ކަމުގެ ބިރު ބޮޑުވެދާނެ ކަމަށް އީރާނުގެ ފޮރިން މިނިސްޓަރު އައްބާސް އަރާޤްޗީ އިންޒާރު ދެއްވައިފިއެވެ.

އޭނާ މި އިންޒާރު ދެއްވީ ބުޝެހްރް ނިއުކްލިއާ ޕަވަރ ޕްލާންޓަށް އަނެއްކާ ވެސް ޙަމަލާ ދީފައި ވާތީއެވެ.

ބުޝެހްރް ނިއުކްލިއާ ޕްލާންޓް ހުންނަނީ އީރާނުގެ ދެކުނު އައްސޭރީގައި ވެރިރަށް ތެހެރާނާއި ގާތްގަނޑަކަށް 750 ކިލޯމީޓަރު ދުރުގައެވެ.

ފާހަގަ ކޮށްލަން ޖެހޭ ކަމަކީ މި ޕްލާންޓް ތެހެރާނަށް ވުރެ ކައިރީ ކުވައިތާއި ސައޫދީ ޢަރަބިއްޔާ އާއެވެ.

ކުވެއިތު ސިޓި އާއި އީރާނުގެ ބުޝެހްރް ނިއުކްލިއާ ޕްލާންޓާއި ދެމެދުގައި ވަނީ ގާތްގަނޑަކަށް 250-300 ކިލޯމީޓަރެވެ.

ދޯހާ އާއި ބުޝެހްރް ނިއުކްލިއާ ޕްލާންޓާއި ދެމެދުގައި ވަނީ ގާތްގަނޑަކަށް 400 ކިލޯމީޓަރެވެ.

ބަހްރައިންގެ ވެރިރަށް މަނަމާ އާއި ބުޝެހްރް ނިއުކްލިއާ ޕްލާންޓާއި ދެމެދުގައި ވަނީ ގާތްގަނޑަކަށް 450 ކިލޯމީޓަރެވެ. އިރުމަތީ ސައުދީ އަރަބިއްޔާއާއި އަބޫދާބީގެ ބައެއް ހިސާބުތަކާއި ވެސް ބުޝެހްރް ނިއުކްލިއާ ޕްލާންޓާއި ދެމެދު 300–600 ކިލޯމީޓަރުގެ ދުރުމުން ހުންނާތީވެ، މި ޕުލާންޓުން ރޭޑިއޯއެކްޓިވް މާއްދާތައް ލީކު ވެއްޖެ ނަމަ ތެހެރާނަށް ވުރެ ބޮޑަށް ނުރައްކާ ވާނީ ކުވެއިތުގެ ވެރިރަށް ކުވެއިތު ސިޓީ އަށާއި، ބަހްރައިންގެ ވެރިރަށް މަނަމާ އަށާއި ޤަޠަރުގެ ވެރިރަށް ދޯހާ އަށާއި، ސައޫދީގެ ދަމްމާމަށާއި، ޔޫއޭއީގެ އަބޫދާބީ އަށެވެ.

ބުޝެހްރް ނިއުކްލިއަރ ފެސިލިޓީ ހަލާކު ވެއްޖެ ނަމަ ވައިގެ ޒަރީޢާ އިން ރޭޑިއޯއެކްޓިވް ޕާރޓިކަލްތައް ތެހެރާނަށް ވުރެ އަވަހަށް އިސްވެ ދެންނއވި ސިޓީ ތަކަށް ދަތުރުކުރުމުގެ ފުރުޞަތު އެބައޮތެވެ. އެއީ ދުރުމިނުގެ ގޮތުންނެވެ.

އަނެއްކޮޅުން ޤަލްފުގެ ކަނޑުގެ ތެރެއަށް ރޭޑިއޯއެކްޓިވް މާއްދާ ފެތުރިއްޖެ ނަމަ، އެތައް މިލިއަން ބަޔަކަށް އޭގެ އަސަރު ކުރާނެއެވެ. ޑީސެލިނޭޝަން ޕްލާންޓްތަކަށް އަސަރު ފޯރާފާނެ ކަމަށް ސައެންސް ވެރިން ބުނެއެވެ.