ސައުދީ އަރަބިއްޔާގެ ގައުމީ އެއާލައިން، ސައުދިއާ އިން ދިވެހިރާއްޖެއަށް ދަތުރުތައް ފަށާފައިވާތާ 10 އަހަރު ފުރުން އިއްޔެ ކުލަގަދަގޮތެއްގައި ފާހަގަކޮށްފިއެވެ.
ސައުދިއާ އިން ރާއްޖެއަށް އެންމެ ފުރަތަމަ ދަތުރުތައް ފަށާފައިވަނީ 30 މާޗު 2016 ގަ އެވެ. މި މުނާސަބަތު ފާހަގަކުރުމުގެ ގޮތުން އިއްޔެ ރާއްޖެ އައި ސައުދިއާގެ ފްލައިޓް، SV838 އިން ދަތުރުކުރި ފަސިންޖަރުންނަށް ވެލާނާ އިންޓަނޭޝަނަލް އެއާޕޯޓުން ވަނީ ވަރަށް ހޫނު މަރުހަބާއެއް ކިޔާފަ އެވެ. އަދި ހަމައެއާއެކު، އެ އެއާލައިނުން އިއްޔެ ފުރި ފަސިންޖަރުންގެ އަގުވަޒަންކުރުމުގެ ގޮތުން ހާއްސަ ހަދިޔާތަކެއް ވަނީ ބަހާފަ އެވެ.
ފާއިތުވި 10 އަހަރު ދުވަހުގެ ތެރޭގައި ސައުދިއާ އިން ރާއްޖެއަށް ކުރަމުންދާ ދަތުރުތަކަކީ ރާއްޖޭގެ ފަތުރުވެރިކަމުގެ ސިނާއަތަށް ލިބިގެންދިޔަ ބޮޑު ކުރިއެރުމެކެވެ. މި ދަތުރުތަކުގެ ސަބަބުން މެދުއިރުމަތީގެ ފަތުރުވެރިން ރާއްޖެއަށް ޒިޔާރަތްކުރާ މިންވަރު އިތުރުވެ، ރާއްޖެއާއި ސައުދީ އަރަބިއްޔާއާ ދެމެދު އޮންނަ ޒަމާންވީ އަހުވަންތަ ގުޅުން އިތުރަށް ހަރުދަނާވެގެން ގޮސްފައިވެ އެވެ.
މީގެ އިތުރުން، މި ދަތުރުތަކަކީ ދިވެހި ހައްޖުވެރިންނާއި އުމްރާވެރިންނަށްވެސް ދަތުރުފަތުރުގެ ފަސޭހަކަން ލިބިގެންދާ މުހިންމު ވަސީލަތެކެވެ. ސައުދިއާ އިން ދަނީ ރާއްޖެއަށް ކުރާ ދަތުރުތަކުގެ ފެންވަރު ރަނގަޅުކޮށް، ދެގައުމުގެ ދެމެދުގައި އޮންނަ އިގްތިސާދީ އަދި އިޖުތިމާއީ ގުޅުން ބަދަހިކުރުމަށް މުހިންމު ދައުރެއް އަދާކުރަމުންނެވެ.
