އީރާނުގެ މިނާބްގައި ހުންނަ "ޝަޖަރޭ ތައްޔިބާ" އަންހެން ކުދިންގެ ސްކޫލަށް ދިން ހަމަލާގައި 168 ކުދިން ޝަހީދުވި ހާދިސާ، ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފި އެވެ. ދިވެހި ސަރުކާރުން ބުނީ މިއީ ބައިނަލްއަގުވާމީ އިންސާނީ ގާނޫނުތަކާއި އިންސާނީ ހައްގުތަކާ ބެހޭ ބައިނަލްއަގުވާމީ ގާނޫނުތަކާ ހިލާފު، ބޮޑު ޖަރީމާއެއް ކަމަށެވެ.
ޖެނީވާގައި ހުންނަ އދ. ގެ އޮފީސްތަކަށް ދިވެހިރާއްޖެއިން ކަނޑައަޅާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދު މިކަން ހާމަކުރެއްވީ، އދ. ގެ އިންސާނީ ހައްގުތަކާ ބެހޭ މަޖިލީހުގެ 61 ވަނަ ދައުރުގެ 49 ވަނަ ބައްދަލުވުމުގައި މިއަދު ބޭއްވި ކުއްލި ބަހުސްގަ އެވެ.
މި ބަހުސްގައި ވާހަކަ ދައްކަވަމުން ޑރ. ސަލްމާ ވަނީ އިޒްރޭލާއި އެމެރިކާއިން އީރާނަށް ދެމުންދާ އަސްކަރީ ހަމަލާތަކާ ގުޅިގެން މެދުއިރުމަތީގެ މަސްރަހު ގޯސްވަމުންދާތީ އެކަމުގެ ކަންބޮޑުވުން ފާޅުކުރައްވާފަ އެވެ. ރާއްޖެއިން ފާހަގަކުރި ގޮތުގައި، ބައިނަލްއަގުވާމީ ގާނޫނުތަކާ ތަކުރާރުކޮށް ހިލާފުވަމުންދާ އަދި "ސްޓޭޓް ޓެރަރިޒަމް" އަށް ހިތްވަރުދޭ އިޒްރޭލަކީ މި ހަމަނުޖެހުންތަކާއި ހަލާކުގެ އަސްލެވެ. އިޒްރޭލުގެ މި އަމަލުތަކުގެ ސަބަބުން ގަލްފުގެ ގައުމުތަކާއި، އުރުދުން، ފަލަސްތީން އަދި ލުބުނާނުގެ މަސްރަހު ނުތަނަވަސްވެ، ބޮޑު ކާރިސާއެއްގެ ތެރެއަށް ވެއްޓިފައިވާ ކަމަށް ރާއްޖެއިން ފާހަގަކުރި އެވެ.
މީގެ އިތުރުން، ބައިނަލްއަގުވާމީ އިންސާނީ ގާނޫނުތަކާ ހިލާފުވާ ފަރާތްތަކަށް އަދަބު ނުލިބި ސަލާމަތްވުމުގެ ސަގާފަތް ނިމުމަކަށް ގެނައުމަކީ ކޮންމެހެން ކުރަންޖެހިފައިވާ ކަމެއް ކަމަށް ދިވެހި ސަރުކާރުން ގޮވާލި އެވެ. މަސްރަހު ފިނިކުރުމަށާއި، އާންމުން ހިމާޔަތްކޮށް، ގާނޫނާ ހިލާފުވާ ފަރާތްތައް ޒިންމާދާރުކުރުވުމަށް ބައިނަލްއަގުވާމީ މުޖުތަމައުން ކުރާ މަސައްކަތްތައް އިތުރަށް ވަރުގަދަކުރުމަށް ވެސް ރާއްޖެއިން ވަނީ ގޮވާލާފަ އެވެ.
މިއީ މި ހަފްތާގެ ތެރޭގައި އިންސާނީ ހައްގުތަކާ ބެހޭ މަޖިލީހުގައި ބޭއްވި މިފަދަ ދެވަނަ ކުއްލި ބަހުސެވެ. މީގެ ކުރިން މާޗު 25 ގައި ވަނީ ސައޫދީ އަރަބިއްޔާ، ގަތަރު، ޔޫއޭއީ، ކުވެއިތު، އޮމާން، ބަހްރޭން އަދި އުރުދުންއަށް ދިން އަސްކަރީ ހަމަލާތަކާ ގުޅޭގޮތުން ބަހުސްކޮށްފަ އެވެ. ރާއްޖެއިން މި ދެ ބަހުސްގައި ވެސް ބައިވެރިވެ، ބައިނަލްއަގުވާމީ މުއާހަދާތަކާ އެއްގޮތަށް ރާއްޖެއިން ގެންގުޅޭ ސިޔާސަތުތައް ވަނީ ހާމަކޮށްފަ އެވެ.
