ސްރީލަންކާގައި ކޮންޓްރޯލް ކޮށްގެން ތެޔޮ ވިއްކުމުގެ މަސައްކަތް އެ ގައުމުގެ ސަރުކާރުން ފަށައިފިއެވެ.
ލަންކާ ސަރުކާރުން އާންމުކޮށްފައިވާ މައުލޫމާތުގައި ވާގޮތުން، އާންމުންގެ ބޭނުންތަކަށް ތެޔޮ ހޯދުމަށް ބޭނުންކުރާ ހާއްސަ ޕޯޓަލް އެއް މެދުވެރިކޮށް ވަކި މިންވަރަކަށް ތެޔޮ ދޫކުރުމަށް ވަނީ ނިންމައިފައެވެ. މި ނިޒާމުގެ ދަށުން ތެޔޮ ދޫކުރާނީ ކަނޑައެޅިފައިވާ ވަކި އުސޫލުތަކެއްގެ މަތިންނެވެ.
ލަންކާގެ މިނިސްޓްރީ އޮފް އެނާޖީން ބުނެފައިވާ ގޮތުގައި، ޕޯޓަލް މެދުވެރިކޮށް ކޮންމެ މީހަކަށްވެސް ހާއްސަ ކިއުއާރް ކޯޑެއް ދޫކުރާނެއެވެ. ކޮންމެ ވެހިކަލަކަށްވެސް ތެޔޮ ލިބޭނެ އިންތިޒާމު ހަމަޖައްސާފައިވަނީ މި ކިއުއާރް ކޯޑް މެދުވެރިކޮށް ކަމަށް އެ މިނިސްޓްރީން މައުލޫމާތު ދެއެވެ.
ތެޔޮ ދޫކުރުން ލިމިޓް ކޮށްފައިވާ މިންވަރުތަކަށް ބަލާއިރު، އެ ގައުމުގައި ދުއްވާ ކޮންމެ ސައިކަލަކަށް ހަފުތާއަކު ލިބޭނީ 5 ލީޓަރުގެ ތެޔޮ ކަމަށް މިނިސްޓްރީން ބުނެއެވެ. އަދި ކާރުތަކާއި އޮޓޯތަކަށް ހަފުތާއަކު 15 ލީޓަރު، ވޭންތަކަށް 40 ލީޓަރު އަދި ބަސް ތަކަށް ހަފުތާއަކު 60 ލީޓަރުގެ ތެޔޮ ލިބޭނެ ކަމަށްވެސް އެ މިނިސްޓްރީން ވަނީ ހާމަކޮށްފައެވެ.
ލަންކާގައި ތެޔޮ ދޫކުރުމަށް ކޮންޓްރޯލް ގެނެސް ހާއްސަ ފިޔަވަޅުތަކެއް އަޅަން ފަށާފައިވާއިރު، މިކަމުގެ ސަބަބުން އާންމުން ވަނީ ޕެޓްރޯލް ޝެޑް ސަރަހައްދުތަކުގައި ކިޔޫ ޖައްސަން ފަށައިފައެވެ. މިއީ ތެޔޮ ލިބުމުގެ ދަތިކަމަށް ހައްލެއް ހޯދުމަށް ސަރުކާރުން އެޅި ކުއްލި ފިޔަވަޅެކެވެ.
