މެދުއިރުމަތީގައި ހިނގަމުންދާ ހަނގުރާމައާ ގުޅިގެން ރާއްޖޭގެ އިޤްތިޞާދަށް ކުރިމަތިވެދާނެ ނޭދެވޭ އަސަރުތަކުން ސަލާމަތްވުމަށްޓަކައި، ޚަރަދުކުޑަކުރުމުގެ ފިޔަވަޅެއްގެ ގޮތުން މިއަހަރުގެ ފިޠުރުޢީދާ ދިމާކޮށް ރަށްރަށުގައި އީދު ބޮކި ނުދިއްލުމަށް ސަރުކާރުން ނިންމައިފިއެވެ.
މިކަން ހާމަކުރެއްވީ، މެދުއިރުމަތީގެ މަސްރަހަށް އަންނަމުންދާ ބަދަލުތައް ދެނެގަތުމަށާއި، އޭގެ ސަބަބުން ރާއްޖޭގެ ސަލާމަތާއި އިގްތިސާދީ ހަމަޖެހުމަށް ކުރިމަތިވެދާނެ ނޭދެވޭ އަސަރުތައް ވަޒަންކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކުލަވާލައްވާފައިވާ ވަޒީރުންގެ ކޮމިޓީން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ. މި ބައްދަލުވުމުގައި ވާހަކަފުޅު ދައްކަވަމުން ފޮރިން މިނިސްޓަރު ޢަބްދުﷲ ހަލީލް ވިދާޅުވީ، ރަށްރަށުގައި އީދު ބޮކި ނުދިއްލުމަށް ނިންމެވީ ވަޒީރުންގެ މަޖިލީހުގައި މަޝްވަރާ ކުރެއްވުމަށްފަހު ރައީސުލްޖުމްހޫރިއްޔާ ކަމަށެވެ.
ނަމަވެސް، މި ނިންމުމުގެ ތެރެއިން ރާއްޖޭގެ 5 ސިޓީއެއްގައި އީދު ބޮކި ދިއްލުމަށް ވަނީ ހަމަޖެހިފައެވެ. މިނިސްޓަރު ހަލީލް އިތުރަށް މައުލޫމާތު ދެއްވި ގޮތުގައި، މި 5 ސިޓީގައިވެސް ބޮކި ދިއްލާނީ މުޅި ސިޓީގައެއް ނޫނެވެ. އެއީ ކަނޑައެޅޭ ވަކި ހާއްސަ ލޮކޭޝަންތަކެއްގައެވެ.
މި ފިޔަވަޅަކީ ދުނިޔޭގެ މަސްރަހަށް އަންނަ ބަދަލުތަކާއެކު ރާއްޖޭގެ މާލީ ހާލަތު ދެމެހެއްޓުމަށާއި، ކޮންމެހެން ކުރަންޖެހޭ ހަރަދުތަކަށް އިސްކަންދިނުމުގެ ގޮތުން ސަރުކާރުން އެޅުއްވި މުހިންމު ފިޔަވަޅެއްގެ ގޮތުގައި ވަނީ ފާހަގަކުރައްވާފައެވެ. ސަރުކާރުގެ މި ނިންމުމަކީ އިގްތިސާދީ ހަމަޖެހުން ގާއިމުކުރުމަށް ރައީސް މުޢިއްޒުގެ ސަރުކާރުން ކުރައްވަމުންދާ މަސައްކަތްތަކުގެ ތެރޭގައި ހިމެނޭ ކަމެކެވެ.
