މެދުއިރުމަތީގައި އިޒްރޭލާއި އެމެރިކާ އިސްވެ އީރާނަށް ދެމުންދާ ހަމަލާތަކާ ގުޅިގެން އުފެދިފައިވާ ނުތަނަވަސްކަމުގެ ތެރޭގައި، ރާއްޖެއަށް ބޭނުންވާ ތެލާއި ގޭސް ހުސްނުވެ ލިބޭނެ ކަމުގެ ޔަޤީންކަން ކަށަވަރު ކުރުމަށާއި، އަގުތައް އުފުލުނަ ނުދިނުމަށް ސަރުކާރުން ވަރުގަދަ ފިޔަވަޅުތަކެއް އަޅަމުންދާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.

މެދުއިރުމަތީގެ ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ގޮންޖެހުންތަކާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކުލަވާލެއްވި ވަޒީރުންގެ ހާއްސަ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، މިނިސްޓާރު ވިދާޅުވީ ރައްޔިތުންނަށް ދަތިނުވާނެ ގޮތަށް ކަންކަން ރާވައި އިންތިޒާމު ކުރަމުންދާ ކަމަށެވެ.

ދުނިޔޭގެ ބާޒާރުގައި ތެލާއި ގޭހުގެ އަގު ބޮޑުވަމުންދާކަން ފާހަގަކުރައްވައި ވަޒީރު ވިދާޅުވީ، ރާއްޖޭގައިވެސް ކުރީން ވިއްކި އަގަށް ވުރެ ތެލުގެ އަގު މިހާރު އުފުލިފައިވާ ކަމަށެވެ. ނަމަވެސް، މި އަގުތައް އިތުރަށް އުފުލުނަ ނުދިނުމަށްޓަކައި އެސްޓީއޯއަށް ސަބްސިޑީ ދީގެން ވެސް އަގު ހިފަހައްޓާނެ ކަމުގެ ޔަގީންކަން މިނިސްޓަރު ދެއްވި އެވެ.

"ތެލާއި ގޭހަށް ބަލާއިރު އަޅުގަނޑުމެންނަށް އެއްވެސް ދަތިކަމެއް ނެތި އިރާދަފުޅުކުރެއްވިއްޔާ އެބަހުއްޓޭ. އެކަމަކު ތެލުގެ އަަގު ވަރަށް ބޮޑަށް މައްޗަށް ގޮސްފި،" ވަޒީރު ޒަމީރު ވިދާޅުވި އެވެ.

ތެލުގެ ރައްކާތެރިކަން ކަށަވަރު ކުރުމަށް ކުރެވޭ މަސައްކަތްތަކުގެ ތަފްސީލު ދެއްވަމުން ވަޒީރު ވިދާޅުވީ، ޖަނަވަރީ މަހު އެސްޓީއޯއިން ގަތް ބޮޑު ބޯޓު ތެޔޮ ބަރުކޮށްގެން މިހާރު ރާއްޖެއަށް ދަތުރުކުރަމުންދާ ކަމަށެވެ. މި ބޯޓު ކުރިއަށް އޮތް ހަތަރު ފަސް ދުވަހެއްގެ ތެރޭގައި މާލޭ ބަނދަރަށް ވަންނާނެ ކަމަށާއި، މީގެ އިތުރުންވެސް އިތުރު ބޯޓެއް ތެޔޮ ބަރުކުރުމުގެ މަސައްކަތް ނިމި ވަރަށް އަވަހަށް ރާއްޖެއަށް ދަތުރު ފަށާނެ ކަމަށް މިނިސްޓަރު ވިދާޅުވި އެވެ.

މީގެ އިތުރުން، ރާއްޖެއަށް ބޭނުންވާ ތެލާއި ގޭސް ހޯދުމަށް އިތުރު ޤައުމުތަކާއެކު ވެސް ސަރުކާރުން ދަނީ މަޝްވަރާ ކުރަމުންނެވެ. މި މަޝްވަރާތަކުން ވަރަށް ފަހި ނަތީޖާއެއް ލިބެމުންދާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ވެސް ވަނީ މިއަދުގެ ބައްދަލުވުމުގައި ވިދާޅުވެފަ އެވެ.