އެމެރިކާ އާއި އިސްރާއީލް ގުޅިގެން އީރާނަށް ދެމުންދާ ވަރުގަދަ ހަމަލާތަކަކީ "ނިމުމެއް ނެތް ހަނގުރާމައަކަށް" ބަދަލުވެގެން ނުދާނެ ކަމުގެ ޔަގީންކަން އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ދެއްވައިފި އެވެ.

ޕެންޓަގަންގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ހެގްސެތު ވިދާޅުވީ، އެމެރިކާގެ ސިފައިން އީރާނުގައި ހަމަލާތައް ކުރިއަށް ގެންދަނީ ވަރަށް ބޮޑަށް ބަލަންޖެހޭ ތަންތަނަށް އަމާޒުކޮށް، "ސާޖިކަލް" އަދި ނުހަނު ވަރުގަދަ ގޮތެއްގައި ކަމަށެވެ. އޭނާ ސިފަކުރެއްވި ގޮތުގައި މި އޮޕަރޭޝަނަކީ ކަނޑައެޅިފައިވާ ވަކި މަގްސަދުތަކެއް ހާސިލުކުރުމަށް ހިންގޭ ހަރަކާތްތަކެކެވެ.

މި ހަމަލާތަކާ ގުޅިގެން އެމެރިކާގެ ހަތަރު ސިފައިން މަރުވެފައިވާ ކަމަށް ފެތުރެމުންދާ ރިޕޯޓްތަކަށް އިޝާރާތް ކުރައްވައި ހެގްސެތު ވިދާޅުވީ، މިފަދަ ބޮޑު އަސްކަރީ އޮޕަރޭޝަނެއްގައި ފުރާނައަށް ގެއްލުންވުމަކީ އެކަށީގެންވާ ކަމެއް ކަމަށް ގަބޫލުކުރައްވާ ކަމަށެވެ. ނަމަވެސް، މި ހަމަލާތައް ދިގުލައިގެން ގޮސް މެދުއިރުމަތީގައި އަނެއްކާވެސް ނިމުމެއް ނެތް ހަނގުރާމައެއް ފެށިގެން ދިއުމަށް އެމެރިކާއިން ބޭނުންނުވާ ކަމަށް އޭނާ ތަކުރާރުކޮށް ވިދާޅުވި އެވެ.

އެމެރިކާ އާއި އިސްރާއީލުން އީރާނަށް ދެމުންދާ ހަމަލާތަކުގައި އާންމުންގެ ގިނަ ބަޔަކު މަރުވަމުންދާ ކަމުގެ ކަންބޮޑުވުން ވަނީ އިތުރުވެފަ އެވެ. ރެޑް ކްރެސެންޓުން ހާމަކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިދިޔަ ހަނިމަދުވަހުން ފެށިގެން ދެމުންދާ ހަމަލާތަކުގައި މިހާތަނަށް މަދުވެގެން 555 މީހުން ވަނީ މަރުވެފަ އެވެ.

މީގެ އިތުރުން، އީރާނުގެ ދެކުނުގެ ސަރަހައްދެއްގައި ހުރި ސްކޫލަކަށް އަމާޒުކޮށް ދިން ހަމަލާއެއްގައި އެކަނިވެސް 165 މީހުން މަރުވެފައިވާ ކަމަށް އެ ގައުމުގެ ދައުލަތުގެ މީޑިއާތަކުން ވަނީ ރިޕޯޓްކޮށްފައެވެ. މި ހަމަލާތަކާ ގުޅިގެން ބައިނަލްއަގުވާމީ މުޖުތަމައުގެ ފާޑުކިޔުންތައް އެމެރިކާ އާއި އިސްރާއީލަށް އަމާޒުވަމުންދާއިރު، އީރާނުގެ މަސްރަހު މިހާރު އޮތީ ނުހަނު ނުރައްކާތެރި ފައްތަރެއްގަ އެވެ.