އީރާނާ ދެކޮޅަށް ފެށި އަސްކަރީ އޮޕަރޭޝަނުގެ ފެށުމެއްގެ ގޮތުން އެމެރިކާގެ ފައުޖުތަކުން އީރާނުގެ އަސްކަރީ މަނަވަރަކަށް ހަމަލާދީ ފައްތާލާފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފި އެވެ.

ސެންޓްކޮމްއިން ނެރުނު ބަޔާނެއްގައި ބުނެފައިވަނީ، ހަމަލާގެ ޝިކާރައަކަށްވީ އީރާނުގެ "ޖަމަރާން ކްލާސް" ގެ ކޯވެޓް މަނަވަރެއް ކަމަށެވެ. މި ހަމަލާ ދީފައިވަނީ އީރާނުގެ ދެކުނުގައި އޮންނަ ޗާ ބަހާރު ބަނދަރު ކައިރިން އޮމާން ކަނޑުގެ ސަރަހައްދުގައެވެ.

އެމެރިކާގެ އަސްކަރިއްޔާއިން ބުނި ގޮތުގައި، މި ހަމަލާ ދީފައިވަނީ އީރާނުގެ އަސްކަރީ ގާބިލިއްޔަތު ކުޑަކުރުމަށް ފެށި ހާއްސަ އޮޕަރޭޝަނެއްގެ ދަށުންނެވެ. މި ހަމަލާގެ ސަބަބުން އެ މަނަވަރު މިހާރު އޮމާން ކަނޑުގެ އަޑިއަށް ފެތެމުންދާ ކަމަށްވެސް ސެންޓްކޮމްއިން ވަނީ ކަށަވަރުކޮށްދީފައެވެ.

މި ހާދިސާ ހިނގާފައިވަނީ މެދުއިރުމަތީގެ މަސްރަހު ވަރަށް ބޮޑަށް ނުތަނަވަސްވެފައިވާ ދަނޑިވަޅެއްގައެވެ. އީރާނުގެ ދެކުނު އައްސޭރިފަށުގައި އޮންނަ ޗާ ބަހާރު ސަރަހައްދަކީ އިސްތިރާޖީ ގޮތުން މުހިންމު ސަރަހައްދަކަށްވާއިރު، އެމެރިކާގެ މި އަމަލާއެކު ދެ ގައުމުގެ ދެމެދުގައި އޮތް އަސްކަރީ ކުރިމަތިލުންތައް އިތުރަށް ވަރުގަދަވެގެންދާނެ ކަމަށް މަސްރަހު ދިރާސާކުރާ ފަރާތްތަކުން ލަފާކުރެއެވެ.

މި ހަމަލާއާ ގުޅިގެން އީރާނުގެ ސަރުކާރުން އަދި ވަކި އެއްޗެއް ބުނެފައެއް ނުވެއެވެ. ނަމަވެސް އެމެރިކާއިން ބުނެފައިވަނީ މިއީ އީރާނާ ދެކޮޅަށް ފެށި ފުޅާ އޮޕަރޭޝަނެއްގެ ފުރަތަމަ ފިޔަވަޅު ކަމަށެވެ. މިއީ ސަރަހައްދީ ސަލާމަތާއި ރައްކާތެރިކަމަށްޓަކައި އެޅި ފިޔަވަޅެއް ކަމަށްވެސް އެމެރިކާގެ އަސްކަރިއްޔާއިން ސިފަކުރެއެވެ.