އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސް އުޅުނު ދެ ދިވެއްސަކު ނިޔާވެއްޖެ އެވެ.

އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސް އުޅެނިކޮށް ނިޔާވީ ސަފާ ގުރޫޕާއި ހިޖާޒް ގްރޫޕްގެ ހަވާލުގައި އުމްރާއަށް ދިޔަ ދެ ދިވެހިން ކަމަށް އިސްލާމިކް މިނިސްޓްރީން ވަނީ ހާމަކޮށްފަ އެވެ. ނިޔާވި ދެ މީހުންނަކީވެސް ފިރިހެނުން ކަމަށް އިސްލާމިކް މިނިސްޓްރީން ވަނީ ބުނެފަ އެވެ.

އެ ދެ މީހުންގެ ޖަނާޒާގެ ކަންކަން މިހާރު ފުރިހަމަކޮށްފައިވާ ކަމަށް އެ މިނިސްޓްރީން ވަނީ އިތުރަށް ބުނެފަ އެވެ. މިކަމާ ގުޅޭ އިތުރު ތަފްސީލެއް އަދި ނުލިބެ އެވެ.

މީގެ އިތުރުން މިދިޔަ މަހުގެ 31 ދުވަހު އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސް އުޅުނު ދިވެއްސަކުވެސް ވަނީ ނިޔާވެފަ އެވެ. އެއީ އަލްމަނާސިކް ހައްޖު އެންޑް އުމްރާ ގުރޫޕާއެކު އުމްރާގެ އަޅުކަން އަދާކުރުމަށް ގޮސް އުޅުނު މީހެކެވެ. އެ މީހާ ނިޔާވީ ހާޓް އެޓޭކެއް ޖެހިގެން ކަމަށް ޑޮކްޓަރުން ކަށަވަރުކޮށްދީފައިވާ ކަމަށާއި އަދި އޭނާއަކީ މީގެ ކުރިންވެސް ހިތުގެ ބަލި ހުންނާތީ ޕޭސްމޭކާ ލައްވާފައިވާ މީހެއް ކަމަށް އަލްމަނާސިކް ހައްޖު އެންޑް އުމްރާ ގުރޫޕުން ވަނީ ބުނެފަ އެވެ.

މިދިޔަ ޑިސެމްބަރު މަހާއި މި ހިނގާ ޖެނުއަރީ މަހު 7،000 އަށްވުރެ ގިނަ ދިވެހިން އުމްރާއަށް ދިއުމަށް ހަމަޖެހިފައިވާކަމަށް އިސްލާމިކް މިނިސްޓްރީން ވަނީ ބުނެފަ އެވެ.