އިނގިރޭސީ ޕްރިމިއާ ލީގުގައި އެސްޓަން ވިލާގެ މައްޗަށް 0-2 ގެ ނަތީޖާއިން މޮޅުވެ ލިވަޕޫލަށް އައި ބަލިމަޑުކަމަށް ނިމުމެއް އައިސްފި އެވެ.
އެންފީލްޑުގައި ކުޅުނު މި މެޗުގެ ފުރަތަމަ ގޯލު 1+45 ގައި ކާމިޔާބު ކުރީ މުހައްމަދު ސަލާހެވެ. އޭނާ މި ގޯލު ޖެހީ އެސްޓަން ވިލާގެ ޑިފެންޑަރަކު ހެދި ގޯހެއްގެ ބޭނުން ހިފައިގެންނެވެ.
މެޗުގެ ދެވަނަ ގޯލު ލިވަޕޫލަށް ޖަހައިދިނީ 58 ވަނަ މިނެޓުގައި ގްރެވެންބާޗެވެ. މެކް އެލިސްޓާގެ އެހީތެރިކަމާއެކު އޭނާ މި ގޯލު ކާމިޔާބުކުރީ އޭރިއާ ބޭރުންނެވެ.
މި މެޗުގައި ދެ ޓީމުގެ ފަރާތުންވެސް ފެނިފައިވަނީ ދާދި ހަމަހަމަ ކުޅުމެކެވެ. ޖުމްލަ 11 ހަމަލާ ލިވަޕޫލުން އެސްޓަން ވިލާގެ ގޯލަށް ފޮނުވާލާފައިވާއިރު އެސްޓަން ވިލާ އިން ވަނީ ނުވަ ހަމަލާ ލިވަޕޫލްގެ ގޯލަށް ފޮނުވާލާފަ އެވެ.
މި މޮޅާއެކު ލިވަޕޫލް މިވަނީ ވަގުތީ ގޮތުން ތާވަލުގެ ތިން ވަނައަށް ޖެހިލާފަ އެވެ. އަދި އެސްޓަން ވިލާ ވަނީ ތާވަލުގެ 11 ވަނައަށް ވެއްޓިފަ އެވެ.
މި މެޗުގެ ކުރިން ކުޅުނު ދެ މެޗުން ވެސް ލިވަޕޫލް ވަނީ ބަލިވެފަ އެވެ. މި ހަފްތާގައި ޕެލެސް އަތުން 0-3 ގެ ނަތީޖާއިން ބަލިވެ އެފްއޭ ކަޕުން ކަޓާފައިވާއިރު ޕްރިމިއާ ލީގުގައި ނިމިދިޔަ ހަފްތާގައި ބްރެންޓްފޯޑު އަތުން 2-3 ގެ ނަތީޖާއިން އެ ކުލަބު ވަނީ ބަލިވެފަ އެވެ. ލީގުގައި ކުޅުނު 10 މެޗުގެ ތެރެއިން ލިވަޕޫލް ވަނީ ހަތަރު މެޗުން ބަލިވެފަ އެވެ.
ޗެމްޕިއަންސް ލީގުގައި ރިއަލް މެދްރިޑާ ދެކޮޅަށް ލިވަޕޫލް މި ހަފްތާގައި ނިކުންނާނެ އެވެ.
