ދުންފަތާ ދެކޮޅަށް ހޭލުންތެރިކުރުމުގެ ގޮތުން 24 ގަޑިއިރަށް ކުރިއަށްގެންދިޔަ ހާއްސަ ދުވުން "ނޭޝެނަލް ޓޯޗް ރަން" ގައި ޖުމްލަ 8959 މީހުން ބައިވެރިވެ މި ހަރަކާތް ކާމިޔާބުކަމާއެކު ނިންމާލައިފި އެވެ.
ދުންފަތުގެ ނުރައްކާ އަންގައިދީ، ދުންފަތާ ދެކޮޅަށް މަސައްކަތް ކުރުމަށް އާންމުންނަށް ހިތްވަރުދީ ބާރުއެޅުމުގެ ގޮތުން ކުރިއަށް ގެންދިޔަ މި ދުވުން ކުރިއަށް ގެންގޮސްފައިވަނީ އިއްޔެ ހަވީރު 4 އިން ފެށިގެން މިއަދު ހަވީރު 4 އާ ހަމައަށް މާލޭ އެކުވެނި ޓްރެކުގައެެވެ.
މިއަދުން ފެށިގެން ރާއްޖޭގައި ތަންފީޒުކުރަން ފަށާފައިވާ "ޖެނެރޭޝަނަލް ބޭން އޮން ޓޮބޭކޯ" އާއި ގުޅުވައިގެން ކުރިއަށްގެންދިޔަ ހާއްސަ މި ހަރަކާރް ދުންފަތުގެ ނުރައްކާތަކުން ރައްކާތެރިވުމަށް އާންމުން ހޭލުންތެރިކުރުމުގެ ގޮތުން ހުރިހާ އުމުރެއްގެ މީހުންނަށްވެސް ބައިވެރިވުމުގެ ފުރުސަތު ހުޅުވާލި އެވެ.
މި ހަރަކާތުގައި ދައުލަތުގެ ބައެއް ވަޒީރުންނާއި ކުޅިވަރު ދާއިރާގައި ހަރަކާތްތެރިވާ އެތުލީޓުންނާއި ކުޅިވަރު ކްލަބްތަކާއި އެސޯސިއޭޝަންތަކާއި ސަރުކާރު ހިއްސާވާ ކުންފުނިތަކުގެ މުވައްޒަފުންނާއި އާންމުންގެ ގިނަ ބަޔަކު ވަނީ ބައިވެރިވެފަ އެވެ.
ނެޝެނަލް ޓޯޗް ރަންއަކީ، ސިއްހީ ވުޒާރާއިން އިސްނަގައިގެން ކުޅިވަރާއި ހަށިހެޔޮކަމާބެހޭ ވުޒާރާއާއި، ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އަދި ސަރުކާރުގެ އެކި އިދާރާތަކާއި ކުންފުނިތަކުގެ ބައިވެރިވުމާއެކު ކުރިއަށްގެންދިޔަ ހަރަކާތެކެވެ.
ޖެނެރޭޝަނަލް ބޭން އާއިއެކު 2007 ވަނަ އަހަރުގެ ޖަނަވަރީ މަހުގެ އެއްވަނަ ދުވަހުން ފެށިގެން އުފަންވެފައިވާ އަދި އުފަންވާނޭ ކުދިން ދުންފަތުގެ ބާވަތްތައް ގަތުމާއި، ވިއްކުމާއި، ދުންފަތުގެ އިސްތިއުމާލު ކުރުން އެއްކޮށް މަނާވެގެންދާނެ އެވެ.
މިކަމާ ގުޅިގެން ގާނޫނަށް އިސްލާހު ގެނެސްފައިވާއިރު، އެ އިސްލާހުގައިވާ ގޮތުން ދުންފަތުގެ ބާވަތްތައް ވިއްކޭނީ ލައިސަންސް އޮވެގެން ރަޖިސްޓްރީ ކޮށްފައިވާ ތަންތަނުގައި އެކަނި ކަމަށާއި، އެފަދަ ތަކެތި ގަންނަނީ ކާކުކަން ނޭނގޭގޮތަށް، އޮންލައިންކޮށް ނުވަތަ ވެންޑިން މެޝިން ފަދަ ވަސީލަތްތައް ބޭނުންކޮށްގެން ދުންފަތުގެ ބާވަތްތައް ވިއްކައިގެން ނުވާނެ ކަމަށް މި އިސްލާހުގައި ބަޔާންކޮށްފައިވެ އެވެ.






