މި ސީޒަނުގައި އަދި މިދިޔަ ސީޒަނުގައި ވެސް ހޯދަމުންދާ ދަށް ނަތީޖާތަކުގެ ސަބަބުން ސަޕޯޓަރުން ރުޅިގަދަވެ ކޯޗު ބޭރުކުރަން ގޮވާލަ ގޮވާލަ ތިއްބާ މެންޗެސްޓާ ޔުނައިޓެޑުން އެންމެ ފަހުގެ ޗެމްޕިއަން ލިވަޕޫލް ވެސް ބަލިކޮށްފި އެވެ.

2-1 ގެ ނަތީޖާއިން ޔުނައިޓެޑު، ލިވަޕޫލްގެ މައްޗަށް ކުރި ހޯދާފައިވާއިރު. ޕްރިމިއާ ލީގުގެ މި ސީޒަނުގައި ކުޅުނު ބޮޑު ތިން މެޗުގެ ތެރެއިން ދެ މެޗު އެކުލަބުން މިވަނީ ކާމިޔާބުކޮށްފަ އެވެ. އެއީ މިދިޔަ މަހު ޗެލްސީއާ ދެކޮޅަށް ހޯދި މޮޅާއި މިރޭގެ މޮޅެވެ. އަދި ބޮޑު މެޗަކުން ލީގުގައި ބަލިވެފައިވަނީ މެންޗެސްޓާ ސިޓީ އަތުންނެވެ.

މިރޭގެ މެޗުގައި ފުރަތަމަ ލީޑު ނަގާފައިވަނީ ޔުނައިޓެޑުންނެވެ. މެޗުގެ ފުރަތަމަ ހާފުގެ ދެ ވަނަ މިނެޓުގައި ލިވަޕޫލްގެ ގޯލު ފޫއަޅުވާލީ ފޯވާޑު އެމްބޫމޯ އެވެ. މި ގޯލު ޖަހަން އޭނާ އަށް އެހީވީ ޑިއާލޯ އެވެ.

މުޅި ޖުމްލަ 11 ހަމަލާ ލިވަޕޫލުން ފޮނުވާލާފައިވާއިރު މެޗުގައި ގިނަ ވަގުތު ބޯޅަ ހިފަހައްޓައިގެން ކުޅެފައިވަނީ ވެސް ލިވަޕޫލުންނެވެ. ލިވަޕޫލް އިން ކާމިޔާބުކުރި ހަމައެކަނި ގޯލަކީ 78 ވަނަ މިނެޓުގައި ގަކްޕޯ ގޯލު ކުރިމަތިން ލިބުނު ފުރުސަތެއްގައި ޖެހި ގޯލެކެވެ. ޔުނައިޓެޑް މޮޅުވި ގޯލު 84 ވަނަ މިނެޓުގައި ޔުނައިޓެޑަށް ކާމިޔާބުކޮށްދިނީ ބުރޯނޯ ނަގައިދިން ކްރޮހަކުން މަގުއިރޭ އެވެ. އޭނާ މި ގޯލު ޖެހީ ބޮލުންނެވެ.

މި މޮޅާއެކު ޔުނައިޓެޑް މިވަނީ 13 ޕޮއިންޓާއެކު ތާވަލުގެ ނުވަ ވަނައަށް ޖެހިލާފަ އެވެ. އަދި ލިވަޕޫލް މިވަނީ ތިން ވަނައަށް ވެއްޓިފައެވެ. ލިވަޕޫލަށް ލިބިފައިވަނީ 15 ޕޮއިންޓެވެ. އެއްވަނައިގައި 19 ޕޮއިންޓާއެކު އާސެނަލް އޮތްއިރު ދެވަނައިގައި 16 ޕޮއިންޓާއެކު އޮތީ މެންޗެސްޓާ ސިޓީ އެވެ.