ރާއްޖޭގެ ގައުމީ ބެޑްމިންޓަން ސްކޮޑް ފައިނަލް ކޮށްފިއެވެ.
ބެޑްމިންޓަން އެސޯސިއޭޝަން ވަގުތީގޮތުން ހިންގަމުން އަންނަ އެޑްހޮކް ކޮމިޓީގެ ބެލުމުގެ ދަށުން ގައުމީ ބެޑްމިންޓަން ސްކޮޑް ފައިނަލްކޮށްފައި ވަނީ މި މަހުގެ 11 އިން 13 އަށް ބޭއްވި ޓްރައިއަލްސް އަށް ފަހު އެވެ. ރާއްޖޭގެ އެކި ކަންކޮޅުތަކުން 50 އަށް ވުރެ ގިނަ އެތުލީޓުން ވާދަކޮށްފައިވާއިރު އެންމެ ގިނަ ކުޅުންތެރިން ހޮވާފައި ވަނީ ރިވައިވަލް ސްޕޯޓްސް ކްލަބުންނެވެ.
ފައިނަލް ސްކޮޑަށް ނެގި 16 ކުޅުންގެ ތެރެއިން އަށް ކުޅުންތެރިންނަކީ ރިވައިވަލް ގެ ކުޅުންތެރިން ކަމަށް އެޑްހޮކް ކޮމިޓީން މައުލޫމާތު ދެއްވައެވެ.
އެގޮތުން ގައުމީ ފިރިހެން ސްކޮޑަށް ހޮވުނީ ރިވައިވަލްގެ ހައިޝަމް އިބްރާހިމް، ޒަޔާން ޒަކީ، ނިބާލް އަހުމަދު، ހަސަން ޒަޔާން މުހައްމަދު އަދި އާދަމް މަހީން މުހައްމަދުގެ އިތުރުން ނައިފަރު ބެޑްމިންޓަން އެކަޑަމީގެ އިބްރާހިމް ނާޝިތު ހަމްދީ ހިމެނެއެވެ. ނާޝިތަކީ އޮކްޓޫބަރުގައި ބަހުރެއިންގައި އޮންނަ އޭޝިއަން ޔޫތު ގޭމްސްގައި ވާދަކުރާ ސްކޮޑަށްވެސް ހޮވިފައިވާ ކުޅުންތެރިއެކެވެ.
އަންހެން ސްކޮޑަށް ހޮވުނު ކުޅުންތެރިންނަކީ ރިވައިވަލްގެ ފާތިމަތު ނަބާހާ، އައިމިނަތު ނަބީހާ، އައިޝަތު އާލިޝާ މޫސާ، އަރުތަ ޕްރޮގްރާމުގެ ދަށުން ތަމްރީނުވަމުން އަންނަ 12 އަހަރުގެ ލައިބާ އަހުމަދު މަހުލޫފް، ޝުބާ މުހައްމަދު ޝަރީފް އަދި ޔަލްވީ ހުސެއިން ޒުހުރީއެވެ.
މި އަހަރުގެ މެއި މަހުގެ 16 ވަނަ ދުވަހުން ފެށިގެން ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރާއްޖޭގެ ޓީމު ސަސްޕެންޑްކޮށްފައިވާތީ ގައުމީ ބެޑްމިންޓަން އެސޯސިއޭޝަނަށް ބައިނަލްއަގްވާމީ ގޮންޖެހުމެއް ކުރިމަތިވެފައި ވިޔަސް، އުއްމީދު ކުރަނީ އޭޝިއަން ޔޫތު ގޭމްސްގައި ގައުމީ ސްކޮޑަށް ވާދަކުރެވޭނެ ގޮތަށް އޮކްޓޯބަރުގެ ކުރިން ބީޑަބްލިޔުއެފްގެ ނިންމުން ބާތިލްކުރާނެ ކަމަށެވެ.
