ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)ގެ މެމްބަރު ކަމަށް އިލެކްޝަންސް ކޮމިޝަން (އީސީ)ގެ ކުރީގެ ނައިބު ރައީސް އިސްމާއިލް ހަބީބް އައްޔަންކުރުމަށް ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީން ފާސްކޮށްފިއެވެ.
އެޗްއާރުސީއެމްގެ މެމްބަރުކަމަށް ކުރިމަތިލެއްވި ބޭފުޅުންގެ ތެރެއިން އެ ކޮމިޝަނުގެ މެމްބަރުކަމަށް ހަބީބް އައްޔަންކުރުމަށް މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ސިޓީ މަޖިލީހުގެ ތަޅުމުގައި އިއްވާފައިވަނީ މި މަހުގެ 15 ގައެވެ.
Advertisement
އެޗްއާރުސީއެމްގެ މެމްބަރެއް ގޮތުގައި މީގެ ކުރިން ހުންނެވީ ޑރ. އަހުމަދު އަދުހަމް އަބްދުﷲ އެވެ. އެ މަޤާމު ހުސްވެފައިވަނީ މިދިޔަ އޮކްޓޯބަރު މަހުގެ ތެރޭގައި އެ މަޤާމުން އޭނާ އިސްތިއުފާ ދެއްވުމާ ގުޅިގެންނެވެ.
މީގެ ކުރިން އީސީގެ މެމްބަރުކަމުގައި ހުންނެވި ހަބީބުގެ މެމްބަރުކަމުގެ ދައުރު ހަމަވެފައިވަނީ މިދިޔަ މާޗް މަހުގެ 13 ވަނަ ދުވަހުއެވެ. އޭނާ ވަނ އީސީގައި 21 އަހަރު މަސައްކަތް ކުރައްވާފައެވެ.
ޤާނޫނު ބުނާގޮތުން ކޮންމެ ބޭފުޅަކަށްވެސް އީސީގެ މެމްބަރުކަން ކުރެއްވެނީ ދެ ދައުރެއްގައެވެ. އީސީގެ ނައިބު ރައީސް ކަމުގައި ހަބީބް އެ ކޮމިޝަނުގެ މެމްބަރުކަން ދެ ދައުރެއްގައި ކުރައްވާފައިވާތީ އޭނާއަށް އިތުރު ދައުރެއް އަދައެއް ނުކުރެއްވެއެވެ.
