ގއ. ވިލިނގިލިން އެ އަތޮޅު ކޮލަމާފުއްޓަށް މަސްތުވާތަކެތި އެތެރެކުރަން އުޅުނުކަމުގެ ތުހުމަތުގައި މީހަކު ހައްޔަރުކޮށްފި އެވެ.
ފުލުހުން މިއަދު ބުނީ ކޮލަމާފުއްޓަށް މަސްތުވާތަކެތި އެތެރެކުރަން އުޅުނުކަމުގެ ތުހުމަތުގައި ދެވަނަ މީހަކު ވެސް ހައްޔަރުކުރީ މިދިޔަ ބުރާސްފަތި ދުވަހު ކަމަށެވެ.
އެ މައްސަލާގައި ހައްޔަރުކުރީ މާލެ، ދަފްތަރު ނަންބަރު ރސ 5268، މުހައްމަދު ތޯހާ, 36 އެވެ.
ފުލުހުން ބުނީ އޭނާ އެ ރަށަށް މަސްތުވާތަކެތި އެތެރެކުރަން އުޅުނީ ހަށިގަނޑުގައި ރައްކާކޮށްގެން ކަމަށެވެ.
ވިލިނގިލި ޕޮލިސް ސްޓޭޝަނުން ހިންގި އެ އޮޕަރޭޝަނުގައި އޭނާ ހައްޔަރުކޮށްފައި ވަނީ ވިލިނގިލީ ބަނދަރު ސަރަހައްދުންނެވެ.
އޭނާ ހައްޔަރުކޮށް، ގއ. އަތޮޅު ހޮސްޕިޓަލަށް ގެންގޮސް ކޯޓު އަމުރެއްގެ ދަށުން އޭނާގެ ހަށިގަނޑު ބަލައި ފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއް ހުރި ރަބަރުކޮޅުތަކެއް ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނީ އެ ތަކެތީގެ ވަގުތީ ބަރުދަނަކީ 20 ގުރާމް ކަމަށެވެ.
އޭނާގެ ބަންދާ މެދުގައި ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ބުންޏެވެ.
އާރުޓީއެލް ފެރީއެއްގައި ކޮލަމާފުއްޓަށް މަސްތުވާތަކެތި އެތެރެކުރަން އުޅުނުކަމުގެ ތުހުމަތުގައި މިދިޔަ ބުރާސްފަތި ދުވަހު އެހެން މީހަކު ވެސް ހައްޔަރުކުރި އެވެ. އެ މައްސަލާގައި ހައްޔަރުކޮށްފައި ވަނީ އެ ރަށު ދޮންވެލި، ސައިފުﷲ ސައީދެވެ.
ފުލުހުން ކުރިން ބުނީ އޭނާ ހުއްޓުވައި ބަލައި ފާސްކުރި އިރު، އޭނާ ގެންދިޔަ ފޮށިގަނޑެއްގެ ތެރެއިން މަސްތުވާތަކެތި ކަމަށް ބެލެވޭ އެއްޗެއް ހުރި ޕެކެޓެއް ފެނިފައިވާ ކަމަށެވެ.
