33 ވަނަ ގައުމީ ކެރަމް މުބާރާތުގެ ފުރަތަމަ ޑިވިޝަނުގެ އަންހެން ޑަބަލްސް ޗެމްޕިއަންކަން އައިމިނަތު ވިދާދްގެ ޕެއާ އިން ހޯދައިފިއެވެ. މިއީ މި ޕެއާ ޗެމްޕިއަންކަން ހޯދި ދެވަނަ ފަހަރެވެ.
ފައިނަލްގައި ވިދާދް އާއި ނަހުފާގެ ޕެއާ ވަނީ 2-1 ސެޓުން އައިޝަތު ފައިނާޒް އާއި އަފީފުއްނިސާގެ ޕެއާ ބަލިކޮށްފައެވެ. މި މެޗުގެ ފުރަތަމަ ސެޓު 19-15 އިން ވިދާދް އާއި ނަހުފާގެ ޕެއާ ގެންގޮސްފައިވަނިކޮށް، ދެން ޖެހިގެންއައި ސެޓުން ފައިނާޒް އާއި އަފީފުއްނިސާގެ ޕެއާ މޮޅުވީ 21-14 އިންނެވެ. އަދި އެއަށްފަހު، މެޗުގެ ތިންވަނަ ސެޓުން ވަރަށް ގާތުން ވާދަކޮށް، ވިދާދް އާއި ނަހުފާގެ ޕެއާ މޮޅުވީ 18-17 އިންނެވެ.
Advertisement
ތިންވަނަ ހޮވާ މެޗުގައި އައިމިނަތު ޝުބާ އާދަމް އާއި ފާތިމަތު ރަޔާނާގެ ޕެއާ އަތުން އައިމިނަތު ވިޝާމާ އާއި އާމިނަތު ނިފާޝާގެ ޕެއާ މޮޅުވީ ސީދާ ދެ ސެޓުންނެވެ. މި މެޗުގެ ސެޓުތައް ވިޝާމާ އާއި ނިފާޝާގެ ޕެއާ ކާމިޔާބުކުރީ 22-10، 25-17 އިންނެވެ.
މި މަހުގެ 20 ގައި ފެށި ގައުމީ ކެރަމް މުބާރާތުގެ އެއްވަނަ ޑިވިޝަނުގައި މިކްސް ޑަބަލްސް އާއި އަންހެން އަދި ފިރިހެން ޑަބަލްސްގެ އިތުރުން ސިންގަލްސް އިވެންޓް އަދި ޓީމް އިވެންޓްގެ މެޗުތައް ކުޅުމަށް ހަމަޖެހިފައިވާކަމަށް ކެރަމް އެސޯސިއޭޝަނުން ބުނެއެވެ.
