ޔޫރޯ ފުޓްބޯޅަ މުބާރާތް މިރޭ ނިމިގެންދާއިރު މި މުބާރާތުގެ މޮޅު ކުޅުންތެރިޔާގެ މަގާމް ހޯދާނެ ކުޅުންތެރިޔަކީވެސް ގިނަ ބަޔަކު ޝައުގުވެރިކަން ހުއްޓިފައިވާ ކަމެކެވެ.
މޮޅު ކުޅުންތެރިޔާގެ މަގާމް ހޯދާނެ ކަމަށް ބެލެވޭ ކުޅުންތެރިން:
Advertisement
1. ރޮޑްރީ (ސްޕެއިން)
ސްޕެއިންގެ ރޮޑްރީ އަކީ އޭނާގެ މަގާމަށް ކުޅޭ މިވަގުތު ދުނިޔޭގައި ހުރި އެއްމެ މޮޅު ކުޅުންތެރިޔާ ކަމަށް ގިނަ ބަޔަކު ގަބޫލްކުރާ ކުޅުންތެރިޔާއެވެ. މެންޗެސްޓާ ސިޓީގެ މިޑްފީލްޑަރު ވަނީ މިހާރު ޕްރިމިއާ ލީގުގެ ޗެމްޕިއަން ޓީމަށް އޭނާގެ އަގު ސާބިތުކޮށްދީ، ކުޅުމަށް ގޯލް އިތުރުކޮށް، 2023/24 ސީޒަނުގައި ނުވަ ފަހަރު ގޯލު ޖަހާފައެވެ. ސްޕެއިންގެ މިޑްފީލްޑަރު ވަނީ އޭނާގެ މުހިއްމުކަން މި މުބާރާތުގައި ދައްކައި އިދިކޮޅު ޓީމްތަކުގެ ކުޅުން ހަލާކުކޮށްލާފައެވެ. މީގެ އިތުރުން ގިނަ ބަޔަކު ގަބޫލްކުރާ ގޮތުގައި އޭނާއަކީ ސްޕެއިން ޓީމްގެ އެއްމެ މުހިއްމު ތަބެވެ. އެހެން ކަމުން މުބާރާތުގެ އެންމެ މޮޅު ކުޅުންތެރިޔާގެ މަގާމު ރޮޑްރީއަށް ލިބުމުގެ ފުރުސަތު ވަރަށް ބޮޑެވެ.
2. ޔަމާލް (ސްޕެއިން)
ޝައްކެއްވެސްނެތްގޮތުގައި ސްޕެއިންއަށް މިފަހަރު އެއްމެ އާދަޔާ ހިލާފް ކުޅުމެއް ދައްކަމުން އަންނަ ކުޅުންތެރިޔަކީ ބާސެލޯނާގެ ފުރަތަމަ ޓީމާއި ގައުމީ ޓީމުން ވެސް ޖާގަ ހޯދި އާދަޔާ ހިލާފު ޒުވާން ހުނަރުވެރި ލަމީނޭ ޔަމާލްއެވެ.
މިހާތަނަށް ޔޫރޯ 2024 ގައި އޭނާ ވަނީ ޔޫރޯ ތާރީހުގައި ވެސް އެއް އެޑިޝަންގައި ތިން އެސިސްޓް ހެދި ފުރަތަމަ ފުރާވަރުގެ ކުޅުންތެރިޔާގެ ރިކޯޑް ހަދާފައެވެ. އަދި ބޮޑު މުބާރާތެއްގައި އެންމެ ޒުވާން ގޯލް ޖެހި ކުޅުންތެރިޔާ ( ވޯލްޑް ކަޕް/ޔޫރޯ)، މީގެ ކުރިން ބްރެޒިލްގެ ޕެލޭ އަތުގަ އޮތް ރިކޯޑް މުގުރާލާފައެވެ.
އުމުރުން 16 އަހަރުގައި ސްޕެއިންގެ ސީނިއާ ޓީމަށް ކުޅެ މޮޅު ކުޅުންތެރިތާގެ މަގާމް ހޯދުމުގެ ފުރުސަތު އޭނާއަށް އެބައޮތެވެ.
3. ޖޫޑް ބެލިންހަމް
އިންގްލެންޑުން ޔޫރޯ 2024 އަށް ނުކުތީ ހެވީ ފޭވަރިޓުންގެ ތެރެއިން އެއް ޓީމެއްގެ ގޮތުގައެވެ. ގަރެތު ސައުތުގޭޓްގެ ސްކޮޑްގެ ތެރޭގައި މެޗު ކާމިޔާބު ކުރާނެ ފަދަ ގިނަ ކުޅުންތެރިން ގިނަޔަސް އެ ތަފާތު މި މުބާރާތުގައި ދައްކަމުން އަންނަ ކުޅުންތެރިޔަކީ ހަމަ ޔަގީނުންވެސް ރެއާލް މެޑްރިޑްގެ ޖޫޑް ބެލިންހަމްއެވެ. އިންގްލޭންޑްއަށް ގޯލް އެއްމެ މުހިއްމު ވާ ވަގުތު ގޯލް ޖަހާފައިވާ ބެލިންހަމް އަކީ މި މުބާރާތުގައި އިންގްލެންޑަށް ދެވަނައަށް އެންމެ ގިނަ ގޯލް ޖެހި ކުޅުންތެރިޔާވެސް މެއެވެ.
ޔޫރޯގައި ބެލިންހަމްގެ އެންމެ މޮޅު ކުޅުން އަދި ނުފެނުނަސް މި މުބާރާތުގެ މޮޅު ކުޅުންތެރިޔާ ހޯދުމުގެ އެއް ފެވަރިޓަކީ އޭނާއެވެ.
ޔޫރޯ 2024 ގެ ފޯރިގަދަ ފައިނަލް މެޗް މިރޭ ރާއްޖެ ގަޑިން 12 ޖަހާއިރު ޖަރުމަންގެ ބާރލިން ސްޓޭޑިއަމްގައި ކުޅެވިގެން ދާނެވެ.
