އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ އެތައް އަހަރެއްގެ ހުވަފެނެއް މިއަދު ހަޤީޤަތަކަށް ވެއްޖެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އަންހެނުންގެ ކޮމިޓީތަކުގެ މެންބަރުންނަށް ފުރަތަމަ ފަހަރަށް ރޯދަ އެލަވެންސް ދިނުމަށް ނިންމަވާފައެވެ.

މިއީ މީގެ އެތައް ވެރިކަމެއްގައި އެ ކަނބަލުން އެދިއެދި، އެއްވެސް ވެރިކަމެއްގައި ނުކޮށްދެވުނު ކަމެކެވެ.

އެހެންނަމަވެސް، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނައި އިސްލާޙު ރައީސުލްޖުމްހޫރިއްޔާ މި މަހުގެ 19 ވަނަ ދުވަހު ތަސްދީގު ކުރެއްވުމާއެކު، އަންހެނުންގެ ކޮމިޓީތަކުގެ މެންބަރުންނަށް ފުރަތަމަ ފަހަރަށް ރަމަޟާން މަހުގެ އިނާޔަތް މިހާރު ވަނީ އެ ފަރާތްތަކަށް ޖަމާވެފައެވެ. ސަރުކާރުން ގެނައި އިސްލާޙުގެ ދަށުން، އެހެން ޤާނޫނެއްގެ ދަށުން ރަމަޟާން މަހުގެ އެލަވެންސް ނުލިބޭ ކޮންމެ މެންބަރަކަށް 3000 ރުފިޔާގެ އެލަވެންސެއް ލިބުނެވެ.

ދައުލަތުގެ މީޑިއާއާއި ވާހަކަ ދައްކަވަމުން ހއ. ދިއްދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސް އާމިނަތު ނަހުލާ ވިދާޅުވީ، "މިއީ ފުރަތަމަ ފަހަރު ރޯދަ އެލަވެންސް ލިބުން. އަޅުގަނޑު މިހާރު 12 އަހަރު ވެއްޖެ ކޮމިޓީގައި މަސައްކަތްކުރާތާ.. ރައީސުލްޖުމްހޫރިއްޔާގެ މި ނިންމެވުމަށް އަޅުގަނޑުމެން ވަރަށް ބޮޑަށް ޝުކުރުވެރިވަން. މިއީ އަޅުގަނޑުމެންގެ ދުވަސްވީ އުންމީދެއް ހަޤީޤަތަކަށް ވުން."

މީގެ އިތުރުން، ދ. މީދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސް ދައުލަތުގެ މީޑިއާއަށް ވިދާޅުވީ މިއީ އަންހެނުން ބާރުވެރިކުރުވުމަށާއި ޤައުމަށް ޚިދުމަތްކުރުމަށް ލިބޭ ވަރަށް ބޮޑު ހިތްވަރެއް ކަމަށެވެ. "މި ހިތްވަރާއެކީ އަޅުގަނޑުމެން އަންހެނުން ބާރުވެރިކަމާއެކު ޤައުމަށްޓަކައި، އަންހެނުންނަށްޓަކައި ކުރާ މަސައްކަތް ފަށްފަށުން އިތުރުވެގެންދާނެ. މިއީ އަޅުގަނޑުމެންގެ ހުވަފެންތައް ހަޤީޤަތަކަށް ވެގެން ދިޔަ ދުވަހެއް."

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ނިންމެވުމާއެކު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ އެތައް ދުވަހެއްގެ ކަންބޮޑުވުންތަކަށް ނިމުމެއް އައިސް، އަންހެނުންގެ ކޮމިޓީތަކަށް ޙަޤީޤީ ބާރުވެރިކަން ލިބިގެން ގޮސްފައިވާކަން ފާހަގަކުރެވެއެވެ. މިއީ އަންހެނުންގެ ކޮމިޓީތަކުގެ މެންބަރުންގެ ދުވަސްވީ އުންމީދުތައް ހަޤީޤަތަކަށް ވެގެން ދިޔަ ތާރީޚީ ދުވަހެކެވެ.