ސްޕެއިން އާއި އިންގްލޭންޑް ކުޅޭ ފޯރިގަދަ ފައިނަލް މެޗް މިރޭ އޮންނާނެވެ.
މި މެޗަށް ސްޕެއިން ނުކުންނަނީ މި މުބާރާތް 4 ވަނަ ފަހަރަށް ހޯދައި އެއްމެ ގިނައިން މި މުބާރާތް ކާމިޔާބްކުރި ޓީމްގެ ޝަރަފް ހޯދާށެވެ. އެޔާ ހިލާފަށް އިގިރޭސީން މިރޭގެ މެޗަށް ނުކުންނަނީ ތާރީހުގައިވެސް ފުރަތަމަ ފަހަރަށް މި މުބާރާތް ކާމިޔާބް ކުރާށެވެ.
Advertisement
ފައިނަލަށް ސްޕެއިން އިން ދަތުރުކޮށްފައިވަނީ، މިހާތަނަށް ކުޅުނު ހަ މެޗުން 100 ޕަސެންޓް ހޯދުމުގެ ރިކޯޑަކާއެކު ފައިނަލްގެ ފޭވަރިޓުންގެ ގޮތުގައެވެ. މިއާ ހިލާފަށް އިނގިރޭސިން މި މުބާރާތުގެ ފައިނަލަށް ދިޔައީ އުދަގޫ ގޮތަކަށެވެ.
1964، 2008 އަދި 2012 ވަނަ އަހަރު މި މިބާރާތް ކާމިޔާބް ކުރުމުގެ އިތުރުން 2010 ވަނަ އަހަރުގެ ވޯލްޑް ކަޕް ހޯދުމުގެ ތަޖުރިބާއާއެކު ސްޕެއިން ކުޅުންތެރިންނަށް ނާކާމިޔާބީގެ ބިރެއް ނެތި މެޗަށް ވަދެވޭއިރު، އިގިރޭސީން މި މެޗަށް ނުކުންނަނީ 1996 އަހަރުގެ ފަހުން ތައްޓެއް ހޯދުމުގެ ޕްރެޝަރާއެކުގައެވެ.
މިރޭގެ މެޗުގެ ކުރިން ސްޕެއިންގެ ކޯޗް ލުއިސް ޑެ ލާ ފުއެންޓޭ ބުނީ އޭނާގެ ޓީމް އޮތީ މި މެޗަށް ވަރަށް ރަނގަޅަށް ތައްޔާރުވެފައި ކަމަށާއި މެޗުން މޮޅުވާނެ ކަމުގެ ފުރިހަމަ ޔަގީންކަން އޮތް ކަމަށެވެ. ނަމަވެސް މިއީ ފައިނަލް މެޗެއް ކަމަށާއި މެޗް ދާނީ ވަރަށް ހަމަހަމަކޮށް ވަރަށް ވާދަވެރިކޮށް ކަމަށެވެ. އަދި މެޗް ކާމިޔާބް ކުރަނީ އެއްމެ މަދުން މިސްޓޭކް ހަދާ ޓީމް ކަމަށެވެ.
އިންގްލޭންޑް ކޯޗް ގަރަތް ސައުތްގޭޓް މެޗުގެ ކުރިން ބުނީ މިފަދަ މެޗުތަކަށް ކުޅުންތެރިން އިތުރަށް މޯޓިވޭޓް ކުރަން ނުޖެހޭނެ ކަމަށާއި މެޗުން މޮޅުންވުން އެއީ ކިހާވަރެއްގެ ކަމެއްކަން އިނގޭ ކަމަށެވެ.
"[ސްޕެއިން] އަށް ކުޅުމުގެ ވަރަށް ސާފު ގޮތެއް އެބައޮތް، އެމީހުން ކުޅެނީ ރިއަލް އިންޓެންސިޓީއާ އެކު ވަރަށް ރަނގަޅަށް ޕްރެސް ކޮށްގެން. އެމީހުން ޕޮސިޝަން ވަރަށް ރަނގަޅަށް ގެންގުޅެނީ އެހެންވީމަ ވަރަށް އޯގަނައިޒް ވާން ޖެހޭ. އެކަމަކު އަހަރެމެން ވެސް ބޯޅަ ވަރަށް ރަނގަޅަށް ފަހުން ކުޅުނު ދެ މެޗުގައި ގެންގުޅުނިން." ސައުތް ގޭޓް އިތުރަށް ބުންޔެވެ.
މިރޭ ކުޅޭ ފައިނަލް މެޗް އިތުރަށް ހާއްސަވާ ސަބަބަކީ މިއީ އިންގްލޭންޑްގެ ކެޕްޓަން ހެރީ ކޭން އަށް ކެރިއަރުގައި ތައްޓެއް ނުލިބު އޮތް އޮތުން ނިމުމަކަށް ގެނެވޭނެ މެޗަކަށް ވާތީއެވެ. ކެރިއަރުގައި 400 ގޯލް ޖަހާފައިވާ އުމުރުން 30 އަހަރުގެ ކޭން އަށް އަދި ކެރިއަރުގައި ތައްޓެއް ހޯދިފައެއް ނުވެއެވެ.
ރާއްޖެ ގަޑިން މިރޭ 12 ޖަހާއިރު ކުޅޭ ފައިނަލް މެޗް ކުޅޭނީ ބާރލިންގެ އޮލިމްޕިކް ސްޓޭޑިއަމްގައެވެ.
