ރޯދަ މަހާއި ދިމާކޮށް، މުޅި ރާއްޖޭގެ ބާޒާރުގައި ވިއްކާ ތަކެތީގެ އަގުތައް އެނގޭނޭ ގޮތަށް ފަރުމާކޮށްފައިވާ "އަގުމަގު ޕޯޓަލް" މިނިސްޓްރީ އޮފް އިކޮނޮމިކް ޑިވެލޮޕްމަންޓު އެންޑް ޓްރޭޑުން ލޯންޗުކޮށްފިއެވެ.

މި ޕޯޓަލް ލޯންޗުކޮށްދެއްވީ "ރޯދައަށް ތައްޔާރު" ގެ ނަމުގައި ބޭއްވި ޓީވީ ކަވަރޭޖެއްގައި މިނިސްޓަރު މުހައްމަދު ސައީދެވެ. މިނިސްޓަރު ވިދާޅުވީ މި ޕޯޓަލްގެ މައިގަނޑު މަޤްޞަދަކީ ރަމަޟާން މަހާއި ދިމާކޮށް ވީހާވެސް ހެޔޮ އަގެއްގައި ރައްޔިތުންނަށް ކާބޯތަކެތި ހޯދޭނެ މަގު ތަނަވަސް ކޮށްދިނުން ކަމަށެވެ.

މި ޕޯޓަލްގެ މުހިންމު ނުކުތާތައް:

1. އަގުތައް ކޮންމެ ހަފްތާއަކު އެއްފަހަރު އަދާހަމަކުރެވޭނެއެވެ.

2. އަގުތައް އަދާހަމަކުރާނީ އިކޮނޮމިކް މިނިސްޓްރީގެ އިންސްޕެކްޝަން ޓީމުތަކުންނެވެ.

3. ކުރިމަގުގައި ވިޔަފާރިވެރިންނަށް އަމިއްލައަށް އަގުތައް ޕޯސްޓްކުރެވޭނެއެވެ.

4. މިހާރު ހިމަނާފައިވަނީ މާލެ އަދި ހުޅުމާލޭގެ ފިހާރަތަކުގެ އަގުތަކެވެ.

5. ކުރިއަށް އޮތްތަނުގައި އަތޮޅުތެރޭގެ ފިހާރަތަކުގެ އަގުތައް ވެސް ހިމެނޭނެއެވެ.

"އެޕްލިކޭޝަން ވެގެންދާނީ އެންމެ ހެޔޮ އަގު ބަލާލަން ބޭނުންވީމަ ބަލާލެވޭނެ އެޕްލިކޭޝަން އަކަށް," މިނިސްޓަރު ސައީދު ވިދާޅުވިއެވެ.

މި ޕޯޓަލްގައި ހިމަނާފައިވާ ތަކެތީގެ ލިސްޓު އެކުލަވާލާފައި ވަނީ ބައިނަލްއަޤްވާމީ މިންގަނޑު ތަކަށް ބަލައިގެންނެވެ. މީގެ ސަބަބުން ރައްޔިތުންނަށް ގޭތެރޭގައި ބޭނުންކުރާ އަސާސީ ކާބޯތަކެތީގެ އަގުތައް ފަސޭހައިން ބެލޭނެއެވެ.