ކުރިއަށް އޮތް ރަމަޟާން މަހު ޕޯލިއޯ ވެކްސިން ޖަހައިދޭނީ ރޭގަނޑު ކަމަށް ދަމަނަ ވެށިން ބުނެފިއެވެ.

ދަމަނަ ވެށިން މިއަދު ނެރުނު ނޫސްބަޔާނެއްގައި ބުނީ ރާއްޖެއިން ބޭރަށް އެކި ބޭނުންތަކުގައި ފުރާ ފަރާތްތަކުން ޖަހަން ޖެހޭ ވެކްސިންތަކުގެ ތެރޭގައި ހިމެނޭ ޕޯލިއޯ ވެކްސިން އަކީ އަނގަޔަށް ދޭންޖެހޭ ވެކްސިން އެއް ކަމުން ރަމަޟާން މަހުގެ ދުވާލު ގަޑީގައި އެ ވެކްސިން ނުދެވޭނެތީ ރޭގަނޑުގެ ވަގުތުގައި އެ ވެކްސިން ޖަހައިދިނުމަށް ނިންމާފައިވާ ކަމަަށެވެ.

ޢުމްރާއަށް އަދި އެހެނިހެން ބޭނުންތަކުގައި ރާއްޖެއިން ބޭރަށް ފުރާ ފަރާތްތަކުގެ ތެރެއިން އެ ވެކްސިން ޖަހަން ޖެހޭ ފަރާތްތަކުން ރޭގަނޑު އޮފީސް ހުޅުވާފައި ހުންނަ ގަޑީގައި ވެކްސިން ޖެހޭނެ ކަމަށް ދަމަނަ ވެށިން ބުންޏެވެ.

އެގޮތުން 6 މާރިޗު، 13 މާރިޗު އަދި 20 މާރިޗުގެ ރޭގަނޑު 9:00 އިން 10:00 އަށް ޕޯލިއޯ ވެކްސިން ޖެހުމުގެ ޚިދުމަތް ދޭނެކަމަށް ދަމަނަ ވެށިން ބުންޏެވެ.