ހއ. ތަކަންދުއާއި ހއ. މާރަންދޫއަށް އާރްޓީއެލް ފެރީ ދަތުރުތައް އަންނަ އަންގާރަ ދުވަހު ފެށުމަށް ހަމަޖެހިފައިވާ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިއަދު ހާމަކޮށްފިއެވެ.

މިކަމާ ގުޅޭގޮތުން ސޯޝަލް މީޑިއާގައި ހިއްސާކުރި ޕޯސްޓެއްގައި އެ ވުޒާރާއިން ބުނެފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، އާރްޓީއެލް ފެރީ ދަތުރުތަކުގެ ހއ. އިހަވަންދޫ - ހދ. ކުޅުދުއްފުށި ރޫޓުގައި ހއ. ތަކަންދޫ އަދި ހއ. މާރަންދޫ ހިމަނާފައިވާ ކަމަށެވެ.

މިދިޔަ މަހު ތިލަދުންމަތީ އުތުރުބުރިއަށް ރައީސް ކުރެއްވި ދަތުރުފުޅުގައި ތަކަންދޫއަށް ވަޑައިގެން ދެއްކެވި ވާހަކަފުޅުގައި ވިދާޅުވެފައިވަނީ އަންނަ ރަމަޟާން މަހުގެ ކުރިން އާރްޓީއެލް ފެރީ ތަކަންދޫއާއި މާރަންދޫއަށްވެސް ދަތުރުކުރާ ގޮތް ހައްދަވައިދެއްވާނެ ކަމަށެވެ. މި ވަޢުދު ފުއްދުމުގެ ގޮތުން މިހާރު ވަނީ މި ދެ ރަށަށް ދަތުރުތައް ފެށުމުގެ އިންތިޒާމު ހަމަޖައްސާފައެވެ.

ރާއްޖޭގެ ރަށްތައް ދަތުރުފަތުރުގެ ނިޒާމުން ގުޅާލުމުގެ މަސައްކަތް އެމްޓީސީސީއާ ޙަވާލުކޮށްގެން ކުރިއަށްދަނީ 6 ޒޯނަކަށް ބަހާލައިގެންނެވެ. މިހާތަނަށް ރާއްޖޭގެ 9 އަތޮޅެއްގެ 81 ރަށް އާރްޓީއެލް ފެރީގެ ޚިދުމަތުން ވަނީ ގުޅާލާފައެވެ. އެންމެ ފަހުން މި ޚިދުމަތް ފެށި ނ. އަތޮޅުގައި މީހުން ދިރިއުޅޭ 13 ރަށެއްގައި މި ޚިދުމަތް އަންނަނީ ފޯރުކޮށްދެމުންނެވެ.

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން އިތުރަށް ބުނީ ދެން އެންމެ އަވަހަށް މި ޚިދުމަތް ފެށުމަށް ހަމަޖެހިފައިވަނީ ރ. އަދި ބ. އަތޮޅުގައި ކަމަށެވެ. ރައީސް ވިދާޅުވެފައިވަނީ މި ދެ އަތޮޅުގައި ޖުލައި މަސް ނިމުމުގެ ކުރިން ޚިދުމަތް ފައްޓަވާނެ ކަމަށެވެ.