ޤައުމެއް ތަރައްޤީވެ ކުރިއަރައިގެން ދާނީ ދަރިންނަށް ފެންވަރު ރަނގަޅު ތަޢުލީމެއް ދެވިގެން ކަމަށް ރައީސުލްޖުމްހޫރިއްޔާގެ ނައިބުގެ އަނބިކަނބަލުން އައިޝަތު އަފްރީން މުޙައްމަދު ވިދާޅުވެއްޖެއެވެ.
އެކަމަނާ މިހެން ވިދާޅުވީ އެކްސެލް އިންޓަނޭޝަނަލް ސްކޫލުގެ ދަރިވަރުން ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
މި ރަސްމިއްޔާތުގައި ވާހަކަފުޅު ދައްކަވަމުން އަފްރީން ވިދާޅުވީ، ދަސްވެނިވި ދަރިވަރުން ކުރިމަގުގައި ތަޢުލީމީ އެހެން ހަރުފަތްތަކުން ކާމިޔާބީ ހޯދާނެ ކަމަށް އުއްމީދުކުރައްވާ ކަމަށެވެ. އަދި ހެޔޮ އަޚްލާޤެއް ލިބިފައިވާ ތަޢުލީމީ ޖީލެއް ބިނާކުރުމުގެ މުހިންމުކަމަށް އަލިއަޅުވާލެއްވިއެވެ.
Advertisement
"ކިޔަވާ ކުދިންނަކީ ޤައުމުގެ އިންސާނީ ވަސީލަތް ބިނާކުރުމުގެ އަސާސް. ކޮންމެ ކުއްޖަކީވެސް ތަފާތުކުރުމެއް ނެތި މުހިންމު ކުއްޖެއްގެ ގޮތުގައި ބަލައިގަންނަން ޖެހޭ. ދިވެހި ސަރުކާރުގެ ވިސްނުމަކީ މި ގޮތުގެ މަތީން ތަޢުލީމީ ޖީލު ބިނާކުރުން." އަފްރީން ވިދާޅުވިއެވެ.
އަފްރީންގެ ވާހަކަފުޅުގައި، ހެޔޮލަފާ ރަނގަޅު ޖީލެއް ބިނާކުރުމަށް މުދައްރިސުންނާއި ބެލެނިވެރިން ކުރައްވަމުން ގެންދަވާ މަސައްކަތް ފާހަގަކޮށް އެކަމަށް ޝުކުރު އަދާކުރެއްވިއެވެ.
މި ރަސްމިއްޔާތުގައި 154 ދަރިވަރުން ވަނީ ތަޢުލީމީ ސަނަދު ހާސިލުކޮށްފައެވެ. އަދި ރައީސުލްޖުމްހޫރިއްޔާގެ ނައިބުގެ އަނބިކަނބަލުން ވަނީ ދަސްވެނިވި ދަރިވަރުންނަށް ސެޓްފިކެޓް ހަވާލުކޮށްދެއްވާފައެވެ.
