ރޯދަ މަހަށް ހަނދު ބެލުމުގެ މަސައްކަތް މި މަހުގެ 28 ވަނަ ދުވަހު ކުރިއަށް ގެންދާނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން މިއަދު ހާމަކޮށްފިއެވެ.
ޑީޖޭއޭ އިން ނެރުނު އިއުލާނުގައި ބުނެފައިވާ ގޮތުން، މާލޭގައި ހަނދު ބެލުމުގެ ކަންކަން ކުރިއަށް ގެންދާނީ ކޯޓުތަކުގެ ގާޒީންގެ ކުރިމަތީގައެވެ. އަތޮޅުތެރޭގައި ނަމަ މެޖިސްޓްރޭޓް ކޯޓުތަކުގެ މެޖިސްޓްރޭޓުންގެ ކުރިމަތީގައި ކުރިޔަށްދާއިރު، މެޖިސްޓްރޭޓަކު ނެތް ރަށްރަށުގައި މިކަން ކުރިއަށް ގެންދާނީ ރަށު ކައުންސިލްގެ އިދާރާގެ އިސްވެރިންގެ ކުރިމަތީގައެވެ.
ހަނދު ބެލުމުގެ މަސައްކަތް ފެށުމަށް ހަމަޖެހިފައިވަނީ އެ ދުވަހު ހަވީރު 5:30 އިން ފެށިގެންނެވެ. ޑީޖޭއޭ އިން ބުނީ ހަނދު ފެންނަ މީހުން ވީ އެންމެ އަވަހަކަށް އެކަން އަންގަން ޖެހޭނެ ކަމަށާއި، ހަނދު ފެނުނު އުސްމިނާއި މިސްރާބު ފަދަ މުހިންމު މައުލޫމާތުތައް ހިއްސާކުރަން ޖެހޭނެއެވެ.
Advertisement
މީގެ އިތުރުން، ހަނދު ފެނިގެން ހެކިބަސް އަދާކުރަން އަންނަ މީހުންގެ ހަރަދު ސަރުކާރުން ހަމަޖައްސައިދޭނެ ކަމަށާއި، ހަނދާއި ގުޅޭ މައްސަލަ ނިމެންދެން ކަމާއި ގުޅޭ އިދާރާތައް ހުޅުވިފައި ބަހައްޓާނެ ކަމަށް ވެސް ޑީޖޭއޭ އިން ހާމަކޮށްފައި ވެއެވެ.
