6.7 ކިލޯމީޓަރުގެ ތިލަމާލެ ބްރިޖްގެ 40.47 އިންސައްތަ މަސައްކަތް ނިމިފައިވާކަމަށް ކޮންސްޓްރަކްޝަން އަދި އިންފްރަސްޓްރަކްޗާ މިނިސްޓްރީން ބުނެފިއެވެ.
އެ މިނިސްޓްރީގެ ސްޓޭޓް މިނިސްޓަރ އިބްރާހިމް ތޮޢާމް "އެކްސް" ގައި ކުރެއްވި ޕޯސްޓެއްގައި ވިދާޅުވީ މި މަޝްރޫގެ ދަށުން ބްރިޖުގެ މެރިން ޕްރިކާސްޓް ޑެކް ސެގްމަންޓުގެ ފުރަތަމަ ސެގްމަންޓް ވިލިމާލެ ކައިރިން އަޅާފައިވާ ކަމަށެވެ.
Advertisement
ތޮޢާމް ވިދާޅުވިގޮތުގައި ތިލަމާލެ މަޝްރޫއުގެ ޖުމްލަ 40.47 އިންސައްތަ މަސައްކަތް މިހާތަނަށް ނިމިފައިވާއިރު މިދިޔަ ނޮވެމްބަރު މަހާ ހަމައަށް ނިމިފައިވަނީ އެއްމެ 29 އިންސައްތަ މަސައްކަތް ކަމަށެވެ.
އިންޑިއާގެ އެފްކޮންސް ކުންފުނިން ކުރިޔަށް ގެންދާ މި މަޝްރޫއު އަކީ އެގައުމުގެ އެގްޒިމް ބޭންކުގެ ލޯނަކުން ހިންގާ މަޝްރޫއެކެވެ.
7.7 ބިލިއަން ރުފިޔާގެ މި މަޝްރޫއު މިދިޔަ ސަރުކާރުގައި ތާވަލަށްވުރެ ލަސްކޮށް ދިޔަ ނަމަވެސް ރައީސް ޑރ.މުޢިއްޒް ވެރިކަމާ ހަވާލުވެ މި މަޝްރޫއުގެ ސްޕީޑް ވަނީ އަވަސްކޮށް ޝެޑިއުލްއަށްވުރެ ކުރިޔަށް ޖައްސާފައެވެ.
މި ސަރުކާރުގެ އަމާޒަކީ 2025ގެ ނިޔަލަށް ނުވަތަ 2026ގެ ކުރީކޮޅު މި ބްރިޖްގެ މަސައްކަތް ނިންމައި ހުޅުވުމެވެ.
