Raajjeygai maruge adhabu uvaeh nuleveyne kamah Sarukaarun AlufuDhaalah Angaifi

ޚުލާސާ

ރާއްޖޭގައި މަރުގެ އަދަބު އުވާލުމަކީ އިސްލާމީ ޝަރީއަތާއި ރާއްޖޭގެ ގާނޫނު އަސާސީއާ ހިލާފް ކަމެއް ކަމަށް ވާތީ އެކަން އުވާލެވެން ނެތްކަމަށް ސަރުކާރުން ބުނޭ. އދ. ގެ ހިއުމަން ރައިޓްސް ކައުންސިލްގައި ދިވެހި ސަރުކާރުގެ ފަރާތުން މިކަން އިއުލާންކުރެއްވީ ހޯމް މިނިސްޓަރ އަލީ އިހުސާނެވެ.

ރާއްޖޭގައި މަރުގެ އަދަބު އުވާނުލެވޭނެ ކަމަށް ދިވެހި ސަރުކާރުން އދ. ގެ ހިއުމަން ރައިޓްސް ކައުންސިލްގައި ވިދާޅުވެއްޖެ އެވެ.

އދ. ގެ ހިއުމަން ރައިޓްސް ކައުންސިލްގައި، އިންސާނީ ހައްގުތަކާބެހޭ ޔުނިވާސަލް ޕީރިއަޑިކް ރިވިއު ހާމަކުރުމަށް ސްވިޓްޒަލޭންޑްގެ ޖެނީވާގައި ބޭއްވި ބައްދަލުވުމުގައި ދިވެހި ސަރުކާރުގެ ފަރާތުން ވާހަކަ ދައްކަވަމުން ހޯމް މިނިސްޓަރ އަލީ އިހްސާން ވިދާޅުވީ ރާއްޖޭގެ މަރުގެ ހުކުމް އިއްވަނީ ގާނޫނުތަކުގެ ދަށުން ކަމަށާއި ރާއްޖޭގެ ގާނޫނު އަސާސީގެ މައިގަނޑު މަސްދަރަކީ އިސްލާމީ ޝަރީއަތް ކަމަށްވާތީ، ރާއްޖޭގައި މަރުގެ އަދަބު އުވާލުމަކީ ކުރެވޭނެ ކަމެއް ނޫން ކަމަށެވެ.

މީގެ އިތުރުން މިނިސްޓަރ ފާހަގަ ކުރި ގޮތުގައި ރާއްޖޭގެ ގާނޫނުތަކުގައިވާ ގޮތުން މީހަކަށް މަރުގެ ހުކުމް އިއްވަނީ ވެސް ވަރަށް މަދު ހާލަތެއްގައި ޝައްކެތް ނެތް މިންވަރަށް އެ ކުށް ސާބިތުވުމާއެކުގައެވެ. އަދި އެފަދަ ހުކުމެއް ތަންފީޒް ކުރާނީ ސުޕްރީމް ކޯޓާ ހަމައިން އިސްތިއުނާފްގެ ހުރިހާ މަރުހަލާތައް ނިމުމުން ކަމަށްވެސް ވިދާޅުވިއެވެ.

މަރުގެ ހުކުމް އިއްވާފައިވާ 16 މީހަކު މި ވަގުތު ރާއްޖޭގައި ތިބިއިރު 1954 ވަނަ އަހަރުގެ ފަހުން ރާއްޖޭގައި މަރުގެ ހުކުމް ތަންފީޒުކޮށްފައެއް ނުވެއެވެ.

ރާއްޖޭގައި މަރުގެ އަދަބު އުވައެއް ނުލެވޭނެ ކަމަށް ސަރުކާރުން އދ އަށް އަންގައިފި

0 ރިއެކްޝަންސް / 0 ކޮމެންޓް