ލޭ ހަދިޔާކުރުމާއި، ލެޔާގުޅޭ ޙިދުމަތްތައް ބެލެހެއްޓުމަށް ތައްޔާރުކޮށްފައިވާ "ލޭ އެޕް" މިއަދު ލޯންޗުކޮށްފިއެވެ.
މިއަދު ހެލްތް މިނިސްޓްރީގައި ބޭއްވުނު ހަފްލާގައި "ލޭ އެޕް" ލޯންޗްކޮށްދެއްވީ ހެލްތް މިނިސްޓަރ ޑރ.ޢަބްދުﷲ ޚަލީލެވެ.
Advertisement
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ ރައީސް ޑރ. މުހައްމަދު މުޢިއްޒުގެ އެޖެންޑާގެ އެންމެ ކުރީގައި އޮތް ކަމަކީ ތެލެސީމިއާ ކުދިންނަށް ފަރުވާ ލިބޭނެ ނިޒާމު ވަރުގަދަކުރުން ކަމަށާއި އެކުދިންނަށް ލުއިފަސޭހަކަމާއެކު ފަރުވާ ލިބޭނެ އިންތިޒާމު ހަމަޖައްސައިދިނުންކަމަށެވެ.
މިއަދު ލޯންޗުކުރެވިގެން ދިޔަ "ލޭ" އެޕްލިކޭޝަނަކީ ފަސޭހަކަމާއެކު ލޭ ހަދިޔާ ކުރުމާއި ލޭ ހޯދުމަށް އެޅިގެންދިޔަ ވަރަށް ބޮޑު ފިޔަވަޅެއް ކަމަށާއި މި އެޕްލިކޭޝަންގެ ސަބަބުން ލޭ ހޯދުމަށްޓަކައި ކުރަންޖެހޭ ދަތުރު ކުރުވެ، ހޮސްޕިޓަލްތަކާއި ލޭ ހަދިޔާ ކުރާ ފަރާތާއި، ލޭ ލިބޭ ފަރާތާ އޮންނަ ގުޅުން ވަރުގަދަވެގެން ދާނެ ކަމަށް މިނިސްޓަރ ވިދާޅުވިއެވެ.
ހެލްތް މިނިސްޓްރީން ވިދާޅުވާ ގޮތުގައި މި އެޕްލިކޭޝަންގެ ސަބަބުން ލޭ ހަދިޔާކުރުމާއި މެނޭޖްކުރުމުގެ ހިދުމަތުގައި އާ މިންގަނޑެއް ކަނޑައަޅައި، މުޅި ރާއްޖޭގެ އެކި ކަންކޮޅުތަކުގައި ފުރާނަ ސަލާމަތް ކުރުމަށް ބޭނުންވާ ލޭ މެދުކެނޑުމެއް ނެތި ލިބޭނެ މަގުފަހިވެގެންދާނެ ކަމަށެވެ.
ހެލްތް މިނިސްޓްރީން ވިދާޅުވާ ގޮތުގައި "ލޭ" އެޕުގެ ޙިދުމަތްތައް އޮގަސްޓް މަހުގެ އެއް ވަނަ ދުވަހުގައި ފެށިގެންދާއިރު އެޕްލިކޭޝަންގެ ޑޯނަރެއްގެ ގޮތުގައި ރަޖިސްޓަރ ކުރުމުގެ ފުރުސަތު މިހާރު ހުޅުވާލާފައިވާނެ ކަމަށެވެ. (https://register.ley.mv)
މިއަދުގެ ރަސްމިއްޔާތުގައި ވަނީ 2019ވަނަ އަހަރުން ފެށިގެން މިދިއަ އަހަރާ ހަމައަށް އެންމެ ގިނައިން ދަރުމަވަންތަ ހޮސްޕިޓަލަށް ލޭ ހަދިޔާ ކުރި ފަރާތްތަކަށާއި ލޭ ހަދިޔާކުރުމަށް ކޭމްޕް ހިންގާފައިވާ ކުންފުނިތަކަށް ހަނދާނީ ފިލާ ހަވާލުކޮށްފައެވެ.
