ލިއޮނަލް މެސީއާއި ޖޫލިއަން އަލްވާރޭޒްގެ ގޯލުތަކުން ކެނެޑާ އަތުން 2-0 އިން މޮޅުވެގެން ޑިފެންޑިން ޗެމްޕިއަން އާޖެންޓީނާ ކޮޕާ އެމެރިކާ ފައިނަލުން ޖާގަ ހޯދައިފި.
އާދީއްތަ ދުވަހު ކޮލަމްބިއާއާ ދެކޮޅަށް ފްލޮރިޑާގައި ކުޅޭ ފައިނަލް މެޗްއަކީ އެޓީމްގެ ލެޖެންޑުން ކަމަށްވާ މެސީ، އެންޖެލް ޑި މާރިއާ އަދި ނިކޮލަސް އޮޓަމެންޑީ ފަދަ ބައެއް ކުޅުންތެރިންނަށް ގައުމު ތަމްސީލު ކުރާނެ ފަހު މުބާރާތަށް ވުމުގެ ފުރުސަތު އެބައޮތެވެ.
Advertisement
އާޖެންޓީނާ އިން 15 ފަހަރު ކޮޕާ އެމެރިކާގެ ޗެމްޕިއަންކަން ހޯދައި ވޭތުވެދިޔަ އަށް މުބާރާތުގެ ތެރެއިން ހަ މުބާރާތުގެ ފައިނަލަށް ދަތުރުކުރި ނަމަވެސް ކެނެޑާއިން މި މެޗުގެ ފުރަތަމަ 20 މިނެޓުގައި އާޖެންޓީނާއަށް ނުރައްކާކުރިއެވެ. މިގޮތުން އެ ޓީމްގެ ޖެކޮބް ޝަފެލްބާގް ވަނީ އާގެންޓީނާގެ ގޯލަށް ދުރުން ނުރައްކާތެރި ދެ ހަމަލާއެއް ފޮނުވާލާފައެވެ.
ނަމަވެސް ކުރީކޮޅުގެ ޕްރެޝަރއަށް ފަހު އާޖެންޓީނާއިން ވަނީ މެޗުގެ 22 ވަނަ މިނެޓުގައި މެންޗެސްޓަރ ސިޓީގެ ފޯވާޑް ޖޫލިއަން އަލްވަރޭޒް ޖެހި ގޯލުން ލީޑް ނަގާފައެވެ. މިއީ ރޮޑް ރިގޯ ޑިޕައުލް ދިން ޕާހަކުން އޭނަ ޖެހި ގޯލެކެވެ.
2022 ވަނަ އަހަރުގެ ވޯލްޑް ކަޕް ކާމިޔާބުކުރި އަދި ފީފާގެ ރޭންކިންގެ އެއް ވަނަ އާޖެންޓީނާ މަޑުމަޑުން މެޗުގެ ކޮންޓްރޯލް ހޯދިއިރު، މެސީއަށް ލީޑު ފުޅާކުރަން މެޗުގެ 44 ވަނަ މިނެޓުގައި ލިބުނެވެ. ނަމަވެސް އޭނަ ޖެހި ބޯޅަ ދިޔައީ ގޯލް ދަޑި ކައިރިން ބޭރަށެވެ.
މެޗުގެ ލީޑް އާޖެންޓީނާއިން ފުޅާކުރީ މެޗުގެ 51 ވަނަ މިނެޓުގައި ދުނިޔޭގެ މޮޅު ކުޅުންތެރިޔާގެ މަގާމް އަށް ފަހަރު ހޯދި އަދި ފުޓް ބޯޅައިގެ "ގޯޓް" ގެ ގޮތުގައި ގިނަ ބަޔަކު ގަބޫލްކުރާ ލައޮނަލް މެސީގެ ގޯލުންނެވެ. މި ގޯލާއެކު މެސީ ވަނީ ކޮޕާ އެމެރިކާގެ ތާރީހުގައި އެއްމެ ގިނަ ލަނޑުޖެހުމުގެ ޗާޓުގައި ފަސް ވަނަ އަށް ޖެހިލައި ޕެރޫގެ ޕައޮލޯ ގުއެރެރޯ އާއި ޗިލީގެ އެޑޫއާޑޯ ވާގާސް އާއި އެއްވަރުކޮށްފައެވެ.
މި ބައްޔާއެކު ކެނަޑާއިން މި މުބާރަތް ނިންމާލި ނަމަވެސް އެ ގައުމު ވަނީ ކޮންކަކާފްގެ މަތީ ރޭންކިންގައި ހިމެނޭ ވާދަވެރި މެކްސިކޯ އާއި 2026 ވަނަ އަހަރުގެ ވޯލްޑް ކަޕްގެ ކޯ ހޯސްޓް އެމެރިކާއަށް ވުރެ ރަނގަޅު ހިސާބަކަށް ދަތުރުކޮށްފައެވެ.
އަންނަ އާދީއްތަ ދުވަހު މިއާމީގައި ކުޅޭ ފައިނަލް މެޗުގައި އާޖެންޓީނާ ނުކުންނާނީ ސައުތު އެމެރިކާގެ ގަދަ ބާރު ކޮލަމްބިއާއާ ދެކޮޅަށެވެ.
