ގދ. ގައްދޫގައި ބިދޭސީ މުދައްރިސުން ބޮޑެތި އަގުތަކުގައި ޓިއުޝަން ދޭ މައްސަލަ ބަލައި، އެކަމާއިމެދު ފިޔަވަޅު އަޅާނެ ކަމަށް ކައުންސިލުން އިންޒާރުދިނުމާއި ގުޅިގެން އެ މައްސަލަ އަށް ހައްލެއް ލިބިއްޖެއެވެ.
ކައުންސިލުން މަޢުލޫމާތު ދެއްވިގޮތުގައި، ބިދޭސީ މުދައްރިސުން އާންމުންނަށް ނުކަތާވަރުގެ އަގުތަކެއްގައި ޓިއުޝަން ދޭކަމުގެ ޝަކުވާ ކެނޑިނޭޅި ލިބެމުންދިޔައެވެ. މި ޢަމަލަކީ ޤާނޫނާއި ޤަވާޢިދުތަކާއި ޚިލާފު ކަމެއް ކަމަށާއި، ރަށުގެ ނިޒާމީ ތަޢުލީމުގެ ފެންވަރު ރަނގަޅު ގޮތެއްގައި ހަމަހަމަކަމާއެކު ފޯރުކޮށްދިނުމަށް ހުރަސްއެޅޭނެ ކަމެއް ކަމަށް ކައުންސިލުން ވަނީ ފާހަގަ ކުރައްވާފައެވެ.
މި މައްސަލަ ހައްލު ކުރުމަށްޓަކައި، ޤަވާޢިދާއި ޚިލާފަށް ޓިއުޝަން ދޭ މުދައްރިސުންނާއި މެދު އިމިގްރޭޝަންގެ ޤާނޫނާއި ރާއްޖޭގައި ބިދޭސީން ވަޒީފާ އަދާކުރުމާއި ބެހޭ ޤަވާޢިދުގެ ދަށުން ފިޔަވަޅު އެޅުމަށް ކަމާއި ގުޅޭ އިދާރާތަކަށް ފޮނުވުމަށް ކައުންސިލުން ނިންމިއެވެ.
Advertisement
މަޢުލޫމާތު ލިބޭގޮތުގައި އެރަށުގައި އުޅޭ ބިދޭސީ ޓީޗަރުން ކުދިންނަށް ޓިއުޝަން ނަގައިދެނީ މާއްދާ އަކަށް 800 ނުވަތަ 1،000 ރުފިޔާގެ ރޭޓުންނެވެ. ނަމަވެސް އާންމުކޮށް އެރަށުގައި ޓިއުޝަން ނަގައިދެނީ މާއްދާއަކަށް 300 ނުވަތަ 400 ރުފިޔާއަށެވެ. އެންމެ ބޮޑުކޮށް ވެސް ނަގައިދެނީ 500 ރުފިޔާއަށެވެ.
