ހދ. ހިރިމަރަދޫ ރައްޔިތުން އެދިފައިވާ ގޮތަށް، އެ ރަށުގެ އާބާދީ ހދ. ހަނިމާދޫއަށް ބަދަލުކުރުމަށް ސަރުކާރުން ނިންމައިފި ކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ހާމަކުރައްވައިފިއެވެ.
ހިރިމަރަދޫ ރައްޔިތުން އެހެން ރަށަކަށް ބަދަލުކޮށްދިނުމަށް އެދިފައިވަނީ މިދިޔަ އަހަ އަހަރުގެ ސެޕްޓެމްބަރު މަހުގެ ތެރޭގައެވެ. އަދި މި މަޝްވަރާތައް އޮކްޓޯބަރު މަހުގެ ތެރޭގައި ވަނީ ފެށިފައެވެ. ނަމަވެސް، މި ކަމާއި ގުޅޭ އިތުރު ތަފްސީލު ސަރުކާރުން އަދި ހާމަކުރައްވާފައެއް ނުވެއެވެ.
ހިރިމަރަދޫއަކީ ރާއްޖޭގެ އެންމެ އާބާދީ މަދު ރަށްތަކުގެ ތެރޭގައި ހިމެނޭ ރަށެކެވެ. އެންމެ ފަހުގެ ބޯހިމެނުމުން ދައްކާ ގޮތުގައި އެ ރަށުގެ އާބާދީއަކީ 293 އެވެ.
Advertisement
ސަރުކާރުގެ އަމާޒަކީ ރާއްޖެ 7 ޒޯނަކަށް ބަހާލައިގެން ތަރައްޤީގެ މަޝްރޫޢުތަކެއް ކުރިއަށް ގެންދިއުމެވެ. މި ގޮތުން ކުދި އާބާދީތަކުން މިފަދަ ސަރަޙައްދުތަކަށް ބަދަލުވާން އެދޭ ފަރާތްތަކަށް އެ ފުރުސަތު ދެވޭނެ އިންތިޒާމު ހަމަޖެއްސުމަށްވެސް ސަރުކާރުން ވަނީ ނިންމަވާފައެވެ.
ހިރިމަރަދޫ ރައްޔިތުން އެހެން ރަށަކަށް ބަދަލުކުރަން ބޭނުންވާކަން ސަރުކާރަށް އެންމެ ފުރަތަމަ ހުށަހަޅުއްވާފައިވަނީ ވަޒީރު އާދަމް ޝަރީފާއެކު ބޭއްވެވި ބައްދަލުކުރެއްވުމެއްގައި މިދިޔަ އަހަރުގެ ސެޕްޓެންބަރ މަހުއެވެ. އެރަށުގެ ރައްޔިތުން އޭރު އެދިފައިވަނީ ކ. ތުލުސްދުއަށް ބަދަލުވުމަށެވެ. ނަމަވެސް މިހާރު ބޭނުންވަނީ ހަނިމާދޫއަށް ބަދަލުވާށެވެ.
ހިރިމަރަދޫގެ އިތުރުން، އާބާދީ ބަދަލުކުރުމަށް ވ. ރަކީދޫން ވެސް ވަނީ އެދިފައެވެ.
