ރ. އުނގޫފާރުން ށ. މިލަންދޫއަށް ދަތުރުކުރަމުންދިޔަ 15 މީހުން ތިބި ލޯންޗެއް މިއަދު ހަވީރު 5:30 ހާއިރު ށ. މަގޫދޫ ކައިރިން ބަންޑުން ޖަހާލައިފިއެވެ.
އުނގޫފާރު ކައުންސިލުގެ ރައީސް އަބްދުﷲ ރަޝީދު ވިދާޅުވި ގޮތުގައި ލޯންޗު ބަންޑުން ޖަހާލީ ޕެޗު އަޅާފައި ހުރި ތަނެއް ފަޅައިގެން ގޮސް ދިޔަވާން ފެށުމުންނެވެ. ލޯންޗުގައި ތިބި އެންމެންނަކީ އެއް އާއިލާއެއްގެ ބައެއް ކަމަށާއި މިލަންދޫއަށް ދިޔައީ ޗުއްޓީއަށް ކަމަށް ވެސް އޭނާ ވިދާޅުވިއެވެ.
ލޯންޗުގައި ތިބި މީހުންގެ ތެރޭގައި އަންހެނުންނާއި ކުޑަކުދިންނާއި އުމުރުން ދުވަސްވީ މީހަކު ހިމެނެއެވެ. ނަމަވެސް ލޯންޗު ބަންޑުން ޖަހާލުމުގެ ކުރިން މިލަންދޫން ފޮނުވި ލޯންޗަކުން އެންމެން ސަލާމަތްކުރެވުނެވެ.
Advertisement
މި ހާދިސާގައި ޖިސްމާނީ ގޮތުން އެއްވެސް މީހަކަށް އަނިޔާއެއް ނުވި ނަމަވެސް، ނަފްސާނީ ގޮތުން އަސަރުކޮށްގެން ތިން މީހަކު މިލަންދޫ ސިއްޙީ މަރުކަޒުގައި އެޑްމިޓް ކޮށްފައިވާ ކަމަށް ޚަބަރު ލިބެއެވެ.
މި ހާދިސާ ފުލުހުން ދަނީ ތަޙްޤީޤު ކުރަމުންނެވެ.
