ވޭތުވެދިޔަ ދެދުވަހުގެ ތެރޭގައި ދެ ސިޔާސީ ޕާޓީއެއް އުވާލައި، ސިޔާސީ ޕާޓީތަކުގެ ދަފްތަރުން އުނިކޮށްފިއެވެ. އިއްޔެ އުވައިލީ މޯލްޑިވްސް ރިފޯމް މޫވްމަންޓް (އެމްއާރްއެމް) އެވެ. މިއަދު އުވައިލީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެވެ.
ޕީޕީއެމް އުވައިލީ އެ ޕާޓީން އެގޮތަށް އެދިގެންނެވެ.
އެމްއާރްއެމް އުވައިލީ ސިޔާސީ ޕާޓީގެ ޤާނޫނުގެ ދަށުން ސިޔާސީ ޕާޓީގައި ހަމަވާންޖެހޭ 3،000 މެންބަރުންގެ ޢަދަދު ހަމަނުވާތީއެވެ. ޕީޕީއެމް އާއި އެމްއާރްއެމް އަކީ ކުރީގެ ރައީސް މައުމޫން ޢަބްދުލްޤައްޔޫމް އިސްވެ ހުންނަވައިގެން އުފެއްދެވި ޕާޓީތަކެވެ.
Advertisement
އެމަނިކުފާނު އެމްއާރްއެމް އުފެއްދެވީ، ކޮއްކޯފުޅު ކުރީގެ ރައީސް ޔާމީނު އެ ޕާޓީ “ޖަހައިގަތުމުގެ ސަބަބުން"، ސިޔާސީ މަސައްކަތް ކުރެއްވުމަށް އިތުރު ޕާޓީއެއް އޭރު ބޭނުންފުޅުވާތީއެވެ.
މީގެ ކުރިން ވެސް، 24 މެއި 2023 ގައި، 3،000 މެންބަރުން ހަމަނުވާތީ އެމްއާރްއެމް އުވައިލަން އީސީން ނިންމާފައިވީ ނަމަވެސް، އޭރު އެމްއާރްއެމްއިން އީސީ އާއި ދެކޮޅަށް ސިވިލް ކޯޓަށް މައްސަލަ ހުށަހެޅުމުން، ކޯޓުން ނިންމީ އޭރު، އީސީގެ ނިންމުން ޤާނޫނާ ޚިލާފު ކަމަށެވެ.
އެމްއާރްއެމްއާއި ޚިލާފަށް ޕީޕީއެމް އުވައިލީ އެ ޕާޓީގެ ސެނެޓުން އެކަމަށް އީސީގައި އެދުމުންނެވެ. ޕީޕީއެމް އުވައިލުމަށް އެ ޕާޓީގެ ސެނެޓުން ނިންމީ މިދިޔަ ޑިސެންބަރު މަހުގެ ދެވަނަ ދުވަހު ބޭއްވި ބައްދަލުވުމެއްގައެވެ. މިގޮތަށް ނިންމީ ޕީޕީއެމް އޭރު މަސައްކަތް ކުރަމުން ދިޔައީ، ކޯލިޝަނެއްގެ ތެރެއިން ކަމަށްވާތީވެ، ވެރިކަން ކުރަމުންދަނީ އެޕާޓީގެ އުސޫލްތަކާއި ފިކުރާއި އެއްގޮތް ޕާޓީއެއް ކަމުގައިވާ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށްވެފައި، އެޕާޓީއާއި ޕީޕީއެމްގެ ގިނަ ޢަދަދެއްގެ މެންބަރުން ގުޅެމުން ދިއުމާއެކު ޕާޓީގެ ލީޑާޝިޕަށް ވަކިން ސިޔާސީ ހަރަކާތެއް ކުރިއަށް ގެންދިއުމުގެ ބޭނުން ނުފެންނާތީ ކަމަށް ޕީޕީއެމުން ބުނެފައިވެއެވެ.
2011 ވަނަ އަހަރު ކުރީގެ ރައީސް މައުމޫން ޢަބްދުލްޤައްޔޫމް އިސްވެ ހުންނަވައިގެން ޕީޕީއެމް އުފެއްދެވިއިރު އެ ޕާޓީން ވަނީ ފަސް އަހަރު ވަންދެން ރާއްޖޭގައި ވެރިކަން ވެސް ކޮށްފައެވެ.
އިލެކްޝަންސް ކޮމިޝަނުން ޕީޕީއެމް އުވާލިއިރު އެ ޕާޓީގެ ދަފްތަރުގައި މިދިޔަ އަހަރު ނިމުނުއިރު 12،174 މެންބަރުން ތިއްބެވެ.
މި ދެ ޕާޓީ އުވައިލިއިރު، މިހާރު އަނެއްކާ ވެސް އިތުރު ސިޔާސި ޕާޓިއެއް ވުޖޫދު ކުރުމަށް (ނަޒާކީ ޒަކީ) ވެސް މަސައްކަތް ކުރައްވަމުންދާކަން ފާހަގަ ކުރެވެއެވެ.
