އެކި ކަންކަމާއި ގުޅިގެން އަންހެން ނޫސްވެރިންނަށް ފުރައްސާރަ ކުރާ މައްސަލަ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން މިއަދު ކުށްވެރި ކޮށްފިއެވެ.
އެމްޖޭއޭއިން ނެރުނު ބަޔާނުގައި ބުނެފައިވަނީ، ފާއިތުވި ދެތިން މަސްދުވަހުގެ ތެރޭގައި ނޫސްވެރިން ކަވަރު ކުރާ އެކި ޚަބަރުތަކާއި ސިޔާސީ ކަންކަމާއި ގުޅުވައި އަންހެން ނޫސްވެރިންނަށް ފުރައްސާރަ ކުރުން އިތުރުވެފައިވާ ކަމަށެވެ. މި ގޮތުން، "ސަންގު ޓީވީ"ގެ ނޫސްވެރިޔާ ފާތިމަތު މަދަދާއަށް ސޯޝަލް މީޑިއާގައި ފުރައްސާރަ ކޮށްފައިވާ މައްސަލަ އެމްޖޭއޭގެ ސަމާލުކަމަށް އައިސްފައިވާ ކަމަށް ބަޔާނުގައި ފާހަގަކޮށްފައި ވެއެވެ.
މީގެ އިތުރުން، ރިވާޔާ ނޫހުގެ އެޑިޓަރު އާއިދާ އަބްދުލް ހަކީމް، މިހާރު ނޫހުގެ ނޫސްވެރިޔާ އާސިމާ ނިޒާރު، އަދި ސަންގު ޓީވީގެ ނޫސްވެރިޔާ ލައިޝާ އަހުމަދަށް ވެސް އެކި ކަންކަމާއި ގުޅިގެން ފުރައްސާރަ ކޮށްފައިވާ މައްސަލަތައް ފާހަގަކޮށްފައިވެ އެވެ.
Advertisement
އެމްޖޭއޭއިން ބުނެފައިވަނީ، އަންހެން ނޫސްވެރިންނަށް ފުރައްސާރަކޮށް ބިރުދެއްކުމަށް ކުރެވޭ މިފަދަ އެންމެހައި ޢަމަލުތައް ހަރުކަށި ޢިބާރާތުން ކުށްވެރި ކުރާ ކަމަށެވެ. އަދި މިފަދަ ޢަމަލުތަކަކީ ނޫސްވެރިންގެ މަސައްކަތަށް ހުރަސް އަޅައި، ރޫހާނީ ގޮތުން އެ މީހުން ބަލިކޮށްލައި ފަހަތަށް ޖެއްސުމަށް ބައެއް ފަރާތްތަކުން ގެންގުޅޭ އުކުޅުތަކެއް ކަމުގައި ދެކޭ ކަމަށް އެމްޖޭއޭއިން ބުންޏެވެ.
އެމްޖޭއޭއިން ބުނީ، މީޑިއާގެ ދާއިރާގައި އަންހެނުން ހަރަކާތްތެރިވާ މިންވަރު މަދުކަމާއި، މިފަދަ ފުރައްސާރަ ތަކަކީ އަންހެނުން މި ދާއިރާއަށް ނުކުތުމަށް ފަސްޖެހޭނެ ކަމެއް ކަމަށެވެ. އަދި މިހާރު ތިބި އަންހެން ނޫސްވެރިންނަށް ވެސް ދާއިރާގައި ކުރިއަށް ދިޔުމަށް އެޅޭ ވަރަށް ބޮޑު ހުރަހެއް ކަމަށް ފާހަގަކުރިއެވެ.
އެމްޖޭއޭއިން ވަނީ މިފަދަ ކަންކަން އެއްވެސް ފަރާތަކުން ނުކުރުމަށް އިލްތިމާސްކޮށް، ފުލުހުންނަށް މިފަދަ މައްސަލަތައް ސީރިއަސް މައްސަލަތަކުގެ ގޮތުގައި ބަލައި، އެކަށީގެންވާ ފިޔަވަޅު އެޅުމަށް ގޮވާލާފައެވެ.
