ހއ. ތަކަންދޫގެ ތާރީޚީ ތަރިކަ މެދުވެރިކޮށް އެރަށުގައި ކަލްޗަރަލް ޓޫރިޒަމް ތަރައްޤީކުރުމަށް ސަރުކާރުން މަސައްކަތް ފަށަން ވިސްނާފައިވާ ކަމަށާއި، ވިޒިޓަރ އިކޮނޮމީ ފުޅާކުރުމަށް ސަރުކާރުން ބޭނުންވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހާރު ހއ.ގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ތަކަންދޫ ރައްޔިތުންނާއި ބައްދަލުކުރައްވައި ވިދާޅުވީ، ތަކަންދޫއަކީ ޤައުމީ ވިސްނުމެއްގައި ސަމާލުކަން ދޭންޖެހޭ ރަށެއްގެ ގޮތުގައި ސަރުކާރުގެ ސިޔާސަތުގައި ކަނޑައަޅާފައިވާ ކަމަށެވެ. އަދި އެ ރަށުގައި ހުރި ތާރީޚީ ތަންތަނާއި ތަރިކަ ބޭނުންކޮށްގެން ކަލްޗަރަލް ޓޫރިޒަމް ތަރައްޤީކުރުމަށް ސަރުކާރުން ރާވާފައިވާ ކަމަށް ވިދާޅުވިއެވެ.
"ތާރީޚާއި ޘަޤާފަތަށް ލޯބިކުރާ ފަތުރުވެރިން ދުނިޔޭގައި އެތައް މިލިއަން ބަޔަކު އުޅޭ. މި ރަށުގައި ހުރި ތާރީޚީ ތަންތަނާއި ތަރިކަ ބަލައި، އޭގެން ލިބެންޖެހޭ އިންސްޕިރޭޝަން ހޯދުމަށް އަންނަން ބޭނުންވާ ފަތުރުވެރިންނަށް ފުރުސަތު ހޯދައިދިނުމަކީ މުހިންމު ކަމެއް،" ރައީސް ވިދާޅުވިއެވެ.
Advertisement
ތަކަންދޫ ދޮށީ ޢުމުރުގެ މީހަކާއި ރައީސް ޑރ. މުޢިއްޒު ސަލާމް ކުރައްވައި ވާހަކަފުޅު ދައްކަވަނީ: ރައްޔިތުންނާއި ބައްދަލުކުރައްވައި ރައީސް ވިދާޅުވީ އެ ރަށުގައި ލޯކަލް ޓޫރިޒަމަށް އިންވެސްޓް ކުރުމަކީ ދެކޮޅު ޖެހޭނެ ކަމެއް ކަމަށް.
ތަކަންދޫގައި ހުރި ތާރީޚީ ތަންތަނުގެ ތެރޭގައި ހިރިގަލުން ޤާއިމްކޮށްފައިވާ ބޮޑު ޤަބުރުސްތާނެއް އަދި އަލިތަކުރުފާނުގެ ޒިޔާރަތް ހިމެނެއެވެ. މި ތަންތަން ހިމާޔަތްކޮށް، ދުރުރާސްތާއަށް ރައްކާތެރިކުރުމަށް ސަރުކާރުން މަސައްކަތްކުރާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ތަކަންދޫގައި ލޯކަލް ޓޫރިޒަމް ތަރައްޤީކުރުމަކީ ރަނގަޅު އިންވެސްޓްމަންޓަކަށް ވެގެންދާނެ ކަމަށެވެ. އަދި މިކަމަކީ ދެމެހެއްޓެނިވި އަދި ވިޔަފާރީގެ ގޮތުން ފައިދާ ހުރި ކަމަކަށް ވެގެންދާނެ ކަމަށް ވިދާޅުވިއެވެ.
ތަކަންދޫގެ ކައުންސިލުން ވެސް މި މަޝްރޫޢުއަށް ތާއީދުކުރާ ކަމަށް ރައީސް ވިދާޅުވިއެވެ.
ރައީސް ވިދާޅުވީ ކުރިޔަށް އޮތް ޤައުމީ ދުވަސް ފާހަގަކުރުމުގެ ތެރެއިން ވެސް ތަކަންދޫގެ އާޘާރީ ކަންކަމަށް ސަރުކާރުގެ ބަޖެޓުން ޚަރަދުކޮށް ކަލްޗަރަލް ޓޫރިޒަމް ތަރައްޤީ ކުރުމަށް މަސައްކަތް ކުރައްވާނެ ކަމަށެވެ.
"އަދި މިތަނުގަ މިހިރަ ތާރީހީ ކަންކަން ސަލާމަތްކުރުމަށް ބަޖެޓުން ޚަރަދުކޮށްގެން ވެސް ކުރިޔަށް އޮތް ޖީލުތަކަށް ރައްކާތެރިކޮށްދިނުން… އަދި އޭގެއިތުރަށް، އަޅުގަނޑުމެންގެ ކުދިންނަށް، ޖުމްލަކޮށް ތާރީޚް ދަސްކުރަން ބޭނުންވާ އަދި ދިރާސާކުރާ ދިވެހި ކިޔަވާކުދިންނާއި އަދި ރައްޔިތުންނަށް ވެސް އޭގެ ނަފާ ލިބޭ ގޮތަށް މިތަންތަން ދެމެހެއްޓުން އެއީ އަޅުގަނޑުގެ ސިޔާސަތު. އެހެންވީމަ މިދެންނެވި ޤައުމީ ދުވަހާއި ބެހޭ މަޝްރޫޢު ތެރޭގައި މިކަންކަން ހިމަނައިގެން އަޅުގަނޑު ކުރިޔަށް ގެންދަން ނިންމާފަ އޮތްކަން ތިބޭފުޅުންނަށް އަޅުގަނޑު ދަންނަވާލަން" ރައީސް ވިދާޅުވިއެވެ.
