ގއ. ނިލަންދޫ އާއި ދާންދޫއަށް ރޯދަ ހަދިޔާ ގެންދިޔަ ދޯނި ފަރަށް އަރައި، ކާޑު ބަސްތާތައް މޫދަށް

ގއ. ނިލަންދޫ އާއި ދާންދޫގެ ރައްޔިތުންނަށް ރަމަޟާން މަހުގެ ރޯދަ ހަދިޔާގެ ގޮތުގައި ބެހުމަށް ކާޑު ބަރުކޮށްގެން ދިޔަ ދޯންޏެއް މިއަދު ފަތިހު ގއ. އަތޮޅު އެކެފަރު ފަރަށް އަރައި، އޭގައި އުފުލި ހުރިހާ މުދަލެއް މޫދަށް ވެއްޓިއްޖެއެވެ.

ނިލަންދޫ ކައުންސިލުން މަޢުލޫމާތު ދިންގޮތުގައި ފަރަށް އަރާފައިވަނީ ލިއޯ ޓްރޭޑިން ކުންފުނީގެ ދޯންޏެކެވެ. މި ދޯނީގައި ބަރުކޮށްގެން ގެންދިޔައީ އެ ކުންފުނީގެ ޗެއާމަން ކޮންމެ އަހަރަކުވެސް ނިލަންދޫ އާއި ދާންދޫގެ ރައްޔިތުންނަށް ރޯދަ ހަދިޔާގެ ގޮތުގައި ބަހާ ކާޑުގެ ބާވަތްތައް ކަމަށް ކައުންސިލުން ބުންޏެވެ.

ކައުންސިލުން ބުނިގޮތުގައި ދޯނީގައި އުފުލަމުން ދިޔައީ ހަނޑޫ، ހަކުރު އަދި ފުށުގެ 50 ކިލޯގެ 1،080 ބަސްތާގެ އިތުރުން ކަދުރެވެ. ނަމަވެސް ދޯނި ފަރަށް އެރުމާ ގުޅިގެން މި ހުރިހާ މުދަލެއްވެސް މޫދަށް ވެއްޓި ކަނޑުވެފައިވާ ކަމަށާއި އެއްވެސް މުދަލެއް ސަލާމަތް ނުކުރެވުނު ކަމަށް ކައުންސިލުން ބުންޏެވެ.

މީގެ އިތުރުން، ފަރަށް އެރުމުގެ ސަބަބުން ދޯނި ފަޅައިގެން ގޮސްފައިވާ ކަމަށާއި، މިހާރު ދޯންޏަށް ދިޔަވަމުންދާ ކަމަށްވެސް ކައުންސިލުން މަޢުލޫމާތު ދިނެވެ.