މިމަހު 14 ވަނަ ދުވަހު ބާލިންގެ އޮލިމްޕިކް ސްޓޭޑިއަމްގައި ފޭވަރިޓުންނަކީ ފްރާންސް އާއި އިންގްލެންޑް ގިނަ ބަޔަކު ބުނަމުން އަންނައިރު، ޔޫރަޕްގެ އެންމެ މަތީ ރޭންކިންގައި އޮތް ފްރާންސްގައި ކައިލިއަން އެމްބާޕޭ އާއެކު މޮޅު ސްކޮޑެއް އެކުލެވިގެންވެ އެވެ. ކޯޗު ޑިޑިއާ ޑެޝަމްޕްސް ބުނީ ހުރިހާ ހިސާބަކަށްވެސް ޓީމު ގެންދެވޭނެ ކަމުގެ ކޮންފިޑެންސް އެބައޮތް ކަމަށާއި އެހެންނަމަވެސް ސެމީފައިނަލާއި ، ފައިނަލްމެޗާއި ދޭތެރޭ ވިސްނަން އަދި ނުޖެހޭ ކަމަށެވެ. ފޯމް ދަމަހައްޓައިފިނަމަ ބޮރޫޝިއާ ޑޯޓްމަންޑްގެ ސިގްނަލް އިޑޫނާ ޕާކުގައި ކުޅޭ ސެމީ ފައިނަލުގައި ފްރާންސް އާއި އިންގްލެންޑް ބައްދަލުވެދާނެ އެވެ.
އަދިވެސް ފުރަތަމަ ފަހަރަށް ޔޫރޯ ޗެމްޕިއަންކަން ހޯދުމަށް ދުވަމުން އަންނަ އިންގްލެންޑް ވަނީ 2021 ވަނަ އަހަރުގެ ފައިނަލުގައި އިޓަލީއާ ދެކޮޅަށް ކުޅުނު މެޗުގައި ޕެނަލްޓީ ޖަހައިގެން ހިތްދަތި ގޮތަކަށް ބަލިވެފައެވެ. އެންމެ ފަހުގެ ވޯލްޑް ކަޕްގައި ފްރާންސް އަތުން ކުއާޓާ ފައިނަލުގައި ބަލިވެފައިވާއިރު މި ދެ ތަޖުރިބާއަކީ އިންގްލެންޑް ވެސް މި މުބާރާތުގެ ތައްޓަށް މޯޓިވޭޓް ވި ކަމެކެވެ. މުހިއްމު ކުޅުންތެރިން ކަމަށްވާ ހެރީ ކޭން އާއި ޖޫޑް ބެލިންހަމް ވިދާލާނެ ކަމަށް ބެލެވެ އެވެ. ބަޔާން މިއުނިކްގައި ގިނަ ސީޒަންތަކެއް ހޭދަކުރުމަށްފަހު ވަށައިގެންވާ މާހައުލަށް އަހުލުވެރި ކޭން އާއި ރެއާލް މެޑްރިޑުގައި ކުޅުނު ބެލިންހަމް ފަދަ ކުޅުންތެރިންގެ ސަބަބުން އިންގްލެންޑަށް ރަނގަޅު ކުރިއެރުމެއް ލިބޭނެ ކަމަށް ބެލެވެއެވެ. ގެރެތު ސައުތުގޭޓް ފާހަގަކުރެއްވި ގޮތުގައި އޭނާގެ ޓީމު އޮތީ ތައްޔާރަށެވެ. ބުރަ މަސައްކަތްތައް ކުރަން ޖެހޭކަމަށް އޭނާ ޤަބޫލުކުރެއެވެ.
