ހދ. މަކުނުދޫގައި އެއަރޕޯޓެއް ޤާއިމުކުރުމަށްޓަކައި ކުރެވެމުންދާ މަސައްކަތުގެ ތެރެއިން ބިން ހިއްކުމުގެ މަސައްކަތް ނިމި، މިހާރު ކުރިއަށްދަނީ ހިއްކި ސަރަހައްދު ޙިމާޔަތްކުރުމުގެ މަސައްކަތްކަމަށް މަކުނުދޫ ކައުންސިލުން މަޢުލޫމާތު ދީފިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން މަކުނުދޫ ކައުންސިލުން ވިދާޅުވީ، މިހާރު ކުރިއަށްދަނީ ހިއްކާފައިވާ ސަރަހައްދުގައި ޖިއޯ ބޭގް ޖެހުމުގެ މަސައްކަތެވެ. އަދި މިސަރަޙައްދުގައި ޖެހުމަށް ހަމަޖެހިފައިވާ ބޮޑުހިލައިގެ ޝިޕްމަންޓް އަންނާނެ ކަމަށް ކޮންޓްރެކްޓަރާއި ހަވާލާދެއްވައި ކައުންސިލުން ވިދާޅުވެއެވެ.
މި މަޝްރޫޢުގެ ދަށުން 43.12 ހެކްޓަރުގެ ބިން ހިއްކާފައިވާއިރު، އެއަރޕޯޓުގައި 1800 މީޓަރުގެ ރަންވޭއެއް އެޅުމަށް ވަނީ ހަމަޖެހިފައެވެ. މިއީ އަސްލު ޕްލޭންގައި ހިމެނިފައިވާ 1500 މީޓަރުގެ ރަންވޭ އަށްވުރެ 300 މީޓަރު ދިގު ރަންވޭއެކެވެ. މި ބަދަލު ގެނެސްފައިވަނީ ރަށުގެ ރައްޔިތުންގެ އެދުމުގެ މަތިންނެވެ.
Advertisement
ހިއްކާފައިވާ ސަރަޙައްދު ޙިމާޔަތްކުރުމަށް 3493 މީޓަރުގެ ރިވެޓްމަންޓެއް ޖެހުމަށް ވެސް ވަނީ ހަމަޖެހިފައެވެ. މި މަޝްރޫޢު ކުރިއަށް ގެންދަނީ ބިގް ފިޝް މޯލްޑިވްސްއިންނެވެ. މި ކުންފުންޏާއި މަސައްކަތް ޙަވާލުކޮށްފައިވަނީ 16 މިލިޔަން ޑޮލަރަށެވެ.
މަކުނުދޫއަކީ އަތޮޅުގެ އެހެން ރަށްތަކާއި ވަކިން އޮންނަ ރަށަކަށް ވުމާއެކު، ސިއްޙީ ކުއްލި ޙާލަތްތަކުގައި ބަލިމީހުން އުފުލުމަށް ދަތިތަކެއް ކުރިމަތިވަމުންދާތީ، އެއަރޕޯޓެއް ތަރައްޤީކުރުމަކީ އެރަށުގެ ރައްޔިތުންގެ އެންމެ ބޮޑު އެއް އެދުމެވެ.
