ފެހުރިހި ބަލަން ދާއިރު ބުރަފަތީގައި ގާޑު އަޅުވަން ޖެހޭގޮތް ހަދަނީ

ފެހުރިހި ހިމާޔަތްކުރުމާއި، އޭގެ ޤުދުރަތީ މާހައުލު ދެމެހެއްޓެނިވި ގޮތެއްގައި ރައްކާތެރިކުރުމަށްޓަކައި އައު ފިޔަވަޅުތަކެއް އަޅަން ނިންމާފައިވާ ކަމަށާއި މީގެ ތެރޭގައި ފެހުރިހި ބަލަން ދާ އުޅަނދުތަކުގެ ބުރަފަތީގައި ގާޑް އަޅުވަންޖެހޭ ގޮތް ހެދުން ހިމެނޭ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު ވިދާޅުވި ގޮތުގައި، ރާއްޖޭގައި 93 ސަރަހައްދެއް ހިމާޔަތްކޮށްފައި އޮތްނަމަވެސް، އޭގެ ތެރެއިން ބެލެހެއްޓެނީ އެންމެ 5 ތަނެކެވެ. އޭގެ ތެރޭގައި އދ. އަތޮޅުގައި ހިމާޔަތްކޮށްފައިވާ ސައުތު އަރި މެރިން ޕާކް (ސަމްޕާ) ސަރަޙައްދަކީ ކޮންމެ ދުވަހަކުވެސް ގިނަ އަދަދެއްގެ ފަތުރުވެރިން ޒިޔާރަތްކުރާ ސަރަޙައްދެކެވެ.

ފެހުރިހި ހިމާޔަތްކުރުމަށް އަޅަން ނިންމާފައިވާ ފިޔަވަޅުތަކުގެ ތެރޭގައި:

1. ފެހުރިހި ބަލަން ދާ އުޅަނދުތަކުގެ ބުރަފަތީގައި ގާޑް އަޅުވަންޖެހޭ ގޮތް ހެދުން

2. ފެހުރިހި ބަލަން ފަތުރުވެރިން ގޮވައިގެން ދާ އުޅަނދުތައް ރަޖިސްޓްރީ ކުރުން

3. ފެހުރިހި ބެލުމަށް ފަތުރުވެރިން ގޮވައިގެން ގޮސް އުޅޭ ގޮތް މޮނިޓަރ ކުރުމަށް ޚާއްސަ ލޯންޗެއް ބޭނުންކުރުން

4. ރައްކާތެރިކަމާއެކު ފެހުރިހި ބެލޭނެ ނިޒާމެއް ޤާއިމްކުރުމަށްޓަކައި ޚާއްސަ ޤަވާއިދެއް ގެޒެޓްކުރުން

މި ފިޔަވަޅުތައް ކުރިއަށް އޮތް 3 މަސްދުވަހުގެ ތެރޭގައި ތަންފީޛު ކުރަން ފަށާނެ ކަމަށް ވަޒީރު ވިދާޅުވިއެވެ. މީގެ އިތުރުން، މިދިޔަ އަހަރު އެކުލަވާލި އައު ޤާނޫނީ އުސޫލުގައި ފެހުރިހި ހިމާޔަތްކުރުމުގައި ސަމާލުވާންވީ ކަންކަމާއި، އަނިޔާވެފައިވާ ނުވަތަ ބަލިވެފައިވާ ފެހުރިއްސާ މެދުގައި އަމަލުކުރާނެ ގޮތް ހިމަނާފައިވާކަން ވެސް ވަޒީރު ފާހަގަކުރެއްވިއެވެ.

ބުރަފަތީގައި ގާޑު އެޅުވުމަކީ މޫދުގައި އުޅޭ މީހުންނަށް ވެސް ރައްކާތެރި ގޮތެކެވެ.

މިދިޔަ ހަފްތާގައި އާޖެންޓީނާގެ ފަތުރުވެރިއެއްގެ ބޮލުގައި ލޯންޗެއްގެ ބުރަފަތިން ޖެހި އޭނާ މަރުވެފައި ވާތީވެ، ސަރުކާރުން މި ގެނައި ބަދަލަކީ މުހިންމު ބަދަލެކެވެ.