ބުރޫނާއީގެ 5 ޔުނިވަރސިޓީއެއްގައި ދިވެހިންނަށް ސްކޮލަރޝިޕް ފުރުސަތުތަކެއް ހުޅުވާލައިފިއެވެ. މިއީ ބުރޫނާއީ ސަރުކާރުގެ "ބުރޫނާއި ގަވަރމެންޓް ސްކޮލަރޝިޕް ޕްރޮގްރާމް" ގެ ދަށުން ދިވެހިންނަށް ލިބޭ ފުރުސަތެކެއް ކަމަށް މަތީ ތައުލީމާއި މަސައްކަތްތެރިކަން ތަރައްގީ ކުރުމާބެހޭ މިނިސްޓްރީން ބުންޏެވެ.
މިނިސްޓްރީން މައުލޫމާތު ދެއްވާފައިވާ ގޮތުގައި، މި ސްކޮލަރޝިޕްގެ ދަށުން ޑިޕްލޮމާ، ޑިގްރީ އަދި މާސްޓާސް ޑިގްރީ ފެންވަރުގެ ކޯސްތަކުގައި ކިޔެވުމުގެ ފުރުސަތު ލިބިގެންދާނެއެވެ. ނަމަވެސް ކޮންމެ ދަރިވަރަކަށްވެސް ހުށަހެޅޭނީ ފުލްޓައިމް އެއް ޕްރޮގްރާމެވެ.
ސްކޮލަރޝިޕްގައި ކިޔެވުމަށް އެދި ހުށައަޅާ ދަރިވަރުންގެ ކިބައިގައި ހުންނަންޖެހޭ ޝަރުތުތައް ދިވެހި ސަރުކާރުގެ ގެޒެޓުގައި ވަނީ ޝާއިޢުކޮށްފައެވެ.
Advertisement
މި ސްކޮލަރޝިޕްގެ ދަށުން ހޮވޭ ދަރިވަރުންނަށް ޓިއުޝަން ފީއާއި، ދިރިއުޅުމުގެ ހަރަދާއި، މެޑިކަލް އިންޝުއަރެންސް ހަމަޖައްސައިދޭނެ ކަމަށް މިނިސްޓްރީން ހާމަކުރެއްވިއެވެ. ސްކޮލަރޝިޕަށް ކުރިމަތިލާ ދަރިވަރުން ހޮވުމުގެ މަސައްކަތް ކުރާނީ ސްކޮލަރޝިޕް ދޭ ފަރާތުންނެވެ.
މިނިސްޓްރީން އިތުރަށް އަންގަވާފައިވަނީ، ސްކޮލަރޝިޕަށް ކުރިމަތިލާ ފަރާތްތަކުން އެމް.ކިއު.އޭ އިން ގަބޫލުކުރާ ޔުނިވަރސިޓީއަކާއި ޕްރޮގްރާމެއްތޯ ބެލުމަށް ސަމާލުކަން ދިނުމަށެވެ. އަދި ފޯމު ހުށަހެޅުމުގެ ސުންގަޑިއަކީ އަންނަ ފެބުރުއަރީ މަހުގެ 15 ވާ ހޮނިހިރު ދުވަހުގެ ބުރޫނާއި ގަޑިން 16:00 ކަމަށް ވެސް އެ މިނިސްޓްރީން އަންގަވާފައިވެއެވެ.
