އެސްޓޯނިއާގެ ރައީސް ޑރ. އަލާރް ކާރިސްގެ ދަޢުވަތަކަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެ ޤައުމަށް ކުރެއްވި ތާރީޚީ ދަތުރުފުޅަށް ފަހު ދިވެހިންނަށް އުފާވެރި ޚަބަރުތަކާއެކު މިރޭ މާލެ ވަޑައިގެންފިއެވެ.
މިއީ ރާއްޖޭގެ ރައީސަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.
ދިވެހި ރައްޔިތުންނަށް ރައީސް ޑރ. މުޢިއްޒުގެ މި ދަތުރުފުޅުން ލިބުނު އެންމެ ބޮޑު އެއް އުފަލަކީ، މި ދައުރުގެ ތެރޭގައި ދިވެހިރާއްޖެއަކީ ފުލީ ޑިޖިޓަލައިޒް ސާވިސްތަކެއް ލިބޭ ޤައުމަކަށް ހެދޭނެއެވެ. ރާއްޖެއަކީ ސައިޒުން ކުޑަވެފައި އާބާދީ މިލިއަނެއް ހަމަނުވިޔަސް، މި ވެރިކަމުގެ މި ދައުރުގައި ޑިޖިޓަލް ދާއިރާއިން ދިވެހިންނަށް ތަފާތު އެތައް ކަމެއްގައި ފަސޭހަތަކެއް ގެނެސްދޭނެއެވެ.
Advertisement
ރައީސް ވިދާޅުވީ، ދުނިޔޭގައި އަންނަ ތަރައްޤީތައް ބަލައިގަންނަން ޖެހޭނެ ކަމަށެވެ.ވިދާޅުވިއެވެ.
"އެހެންވީމަ އެއަށް މާސްޓަރ ޕްލޭނެއް ހެދި އަޅުގަނޑުމެންގެ ޤައުމު ތަރައްގީ ކުރުމުގައި އޭއައި މުހިންމު ދައުރެއް އަދާ ކުރާނެ، އެކަމަށްޓަކައި ކުރަން ޖެހޭ ހުރިހާ ކަމެއްވެސް ކުރިއަށް ގެންދެވޭނެ، މި ދަތުރުގެ ސަބަބުން އަޅުގަނޑުމެންނަށް މި ގައުމުގައި ކޮން ގޮތަކަށްތޯ ކުރަމުން ދަނީ އަދި ރާވަމުން ދަނީ، ރޭވިފައި އޮތީވެސް، ހަމަ ރަނގަޅަށް އޮޅުން ފިލައިގެން ދިޔަ،". ރައީސް ވިދާޅުވިއެވެ.
ރައީސް މުއިއްޒު އެސްޓޯނިއާއަށް ވަޑައިގެންނެވީ މިދިޔަ އާދީއްތަ ހޯމަ ދުވަހުއެވެ. މި ދަތުރުފުޅުގެ މައިގަނޑު މަޤްޞަދަކީ ދެ ޤައުމުގެ ދެމެދުގައި އޮތް ގުޅުން ބަދަހި ކުރުމާއި، ޑިޖިޓަލް، ސައިބަރ އަދި އީ-ގަވަރނަންސް ދާއިރާއިން އަދި މޫސުމާއި ތިމާވެށްޓާ ގުޅުންހުރި މައްސަލަތަކާއި ބެހޭ ގޮތުން ދެ ޤައުމުގެ ދެމެދުގައި މަޝްވަރާ ކުރުމެވެ.
އެސްޓޯނިއާގެ ރައީސް ޑރ. އަލާރް ކާރިސްގެ ދަޢުވަތަކަށް ކުރެއްވި މި ދަތުރުފުޅުގައި އުފެއްދުންތެރި ބައްދަލުވުންތަކެއް ބޭއްވުނު ކަމަށް ރައީސް މުއިއްޒު ވިދާޅުވިއެވެ. މީގެ އިތުރުން، ޑިޖިޓަލައިޒޭޝަނާއި، ތިމާވެށްޓާއި، ސިޔާސީ މަޝްވަރާތަކާ ގުޅޭގޮތުން އެއްބަސްވުންތަކުގައިވެސް ސޮއިކުރެވުނެވެ.
"އިރާދަކުރެއްވިއްޔާ ކުރިއަށް އޮތްތަނުގައި، މި އަހަރު ތެރޭގައި ހާއްސަ ގޮތެއްގައި ޑިޖިޓަލައިޒް ކުރުމަށްޓަކައި ސަރުކާރުގެ ހުރިހާ ހިދުމަތްތަކެއް ޕަބްލިކް ދާއިރާގެ ހުރިހާ ކަމެއް، ތައުލީމީ ދާއިރާ ސިއްހީ ދާއިރާ، ހަމަ އެއްކޮށް ކުރިއަށް އޮތް ތިން، ހަތަރު އަހަރު ތެރޭގައި އަޅުގަނޑުމެން ބޭނުންވާ ގޮތަށް ބަދަލު ކުރާނަން،". ރައީސް ވިދާޅުވިއެވެ.އެސްޓޯނިއާއަކީ ޑިޖިޓަލް ރޭންކިންގއަށް ބަލާއިރު ބޮޑެތި ކުރިއެރުންތަކެއް ހޯދާފައިވާ، ޓެކްނޮލޮޖީގެ ގޮތުން ޔޫރަޕްގައި އެންމެ ކުރިއަރާފައިވާ އެއް ޤައުމެވެ. މި ދަތުރުފުޅުގައި ދެ ޤައުމުގެ ދެމެދުގައި ޓެކްނޮލޮޖީގެ ދާއިރާއިން އިތުރު ގުޅުންތައް ޤާއިމުކުރެވުނު ކަމަށް ބެލެވެއެވެ.
ރައީސް މުއިއްޒުގެ މި ތާރީޚީ ދަތުރުފުޅަކީ ދިވެހިރާއްޖެއާއި އެސްޓޯނިއާގެ ދެމެދުގައި އޮތް ގުޅުން އިތުރަށް ހަރުދަނާކޮށް، ދެ ޤައުމަށް ފައިދާހުރި އެތައް ކަމެއް ހާސިލުކުރެވުނު ދަތުރުފުޅެއް ކަމުގައި ފާހަގަކުރެވެއެވެ.
