މިހާރު އެފްރިކާގައި ދިރިއުޅުއްވާ ކުރީގެ ރައީސް މުޙައްމަދު ނަޝީދު, ދަ ޑިމޮކްރެޓިކް ޕާޓީގެ ހަރަކާތްތަކުން ދުރަށް ޖެހިއްޖެ ކަމަށް ހާމަކުރައްވައިފިއެވެ.
އެމްޑީޕީއާއި ދެބަސްވެ އެ ޕާޓީން ވަކިވެވަޑައިގެން ސިޔާސީ ގޮތުން ކުރިޔަށް ވަޑައިގެންނެވުމަށްޓަކައި އުފެއްދެވި ދަ ޑިމޮކްރެޓްސްއަށް ރާއްޖޭގެ ސިޔާސީ މައިދާނުގައި އެއްވެސް ކާމިޔާބެއް ނުލިބުނުއިރު، އެޕާޓީގައި ތިއްބެވި ނަޝީދުގެ އެނއމެ އަރިސް ބޭފުޅުން ކަމަށްވާ ދަ ޑިމޮކްރެޓްސްގެ މުއައްސިސް އަދި ރައީސް ޙަސަން ލަޠީފާއި ބާރަށު ޝިފާޒު (ޝިއްޕެ)ގެ އިތުރުން ޢަލީ އާޒިމް ވެސް ވަނީ މިހާރު އެމްޑީޕީއާއި ގުޅިވަޑައިގެންފައެވެ.
ކުރީގެ ރައީސް މުޙައްމަދު ނަޝީދު މިއަދު އެމަނިކުފާނުގެ ފޭސްބުކްގައި ވިދާޅުވި ގޮތުގައި އޭނާގެ ހަޔާތުގެ ބޮޑު ބައެއް ހޭދަކުރެއްވީ ދިވެހިރާއްޖޭގައި ގިނަ ޕާޓީ އެކުލެވޭ ނިޒާމެއް ޤާއިމްކުރުމުގެ މަސައްކަތުގައެވެ. އަދި ޤައުމުގެ ތަރައްޤީއާއި ރައްޔިތުންގެ ތަނަވަސްކަމަށް އެންމެ ބޭނުންތެރި ވަސީލަތަކީ ވާދަވެރި ސިޔާސީ ހަރަކާތްތައް ކަމަށް އޭނާ ދެކެވަޑައިގަންނަވާ ކަމަށް ވިދާޅުވިއެވެ.
Advertisement
ނަމަވެސް، މިހާރު އެއްވެސް ޕާޓީއެއްގައި އަމަލީ މަސައްކަތެއް ކުރައްވާކަށް ނެތް ކަމަށާއި، އެހެން ނަމަވެސް ރާއްޖޭގެ ސިޔާސީ ހަރަކާތްތަކުން މުޅިން ދުރުވާކަށްވެސް ނެތް ކަމަށް ނަޝީދު ވިދާޅުވިއެވެ.
ނަޝީދު އިތުރަށް ވިދާޅުވި ގޮތުގައި އެމްޑީޕީއަކީ އޭނާގެ ދަރިއެއް ފަދައިން ދެކޭ ޕާޓީއެއް ކަމަށާއި، އެ ޕާޓީ ވަރުގަދަވެ އޮތުން އެއީ އަބަދުވެސް އޭނާ އެދޭ ކަމެކެވެ. އަދި ފަހުން އޭނާ ބައިވެރިވި ޑިމޮކްރެޓިކް ޕާޓީއަކީ ޚާއްޞަ ގޮތެއްގައި ޒުވާނުންނަށް ސިޔާސީ މަސައްކަތުގައި ބައިވެރިވުމަށް ލިބުނު ފުރުޞަތެއް ކަމަށްވެސް ވިދާޅުވިއެވެ.
ނަޝީދު މިއަދު މިހެން ވިދާޅުވިއިރު، އެމްޑީޕީ ރޫޅާލުމަށް އެމަނިކުފާނު ފިޔަވައި އެހައި ބޮޑަށް މަސައްކަތްކުރެއްވި ބޭފުޅެއް ވެސް ރާއްޖެއަކު ނެތެވެ.
