ކުރީގެ ނައިބު ރައީސް އަބްދުﷲ ޖިހާދުގެ މައްޗަށް ކުރާ ދަޢުވާގެ މައްސަލަ އަލުން ބެލުމަށް ހައިކޯޓުން މިއަދު އަމުރުކޮށްފިއެވެ.
މި މައްސަލައިގައި ޖިހާދުގެ މައްޗަށް ދައުލަތުން ދަޢުވާ ކުރަނީ، 2013 ވަނަ އަހަރު އޭނާ ފިނޭންސް މިނިސްޓަރަކަށް ހުންނެވިއިރު ފުށިދިއްގަރުފަޅުގެ އެއްބަސްވުމުގައި ސަރުކާރުގެ ފަރާތުން ސޮއި ކުރެއްވުމުގައި ދައުލަތަށް ފައިދާނުވާ ގޮތަށް އަމަލުކުރެއްވި ކަމަށް ބުނެއެވެ.
ކުރިން މި މައްސަލަ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމުމާ ގުޅިގެން، ދައުލަތުން ވަނީ ހައިކޯޓުގައި އިސްތިއުނާފްކޮށްފައެވެ.
Advertisement
ހައިކޯޓުން މިއަދު ކުރި ހުކުމުގައި ބުނެފައިވަނީ، ދަށު ކޯޓުން މައްސަލަ ބޭރުކޮށްލާފައިވަނީ ޤާނޫނީ ކޮން އަސާސެއްގެ މައްޗަށް ބިނާކޮށްކަން ސާފުނުވާ ކަމަށެވެ. އެހެންކަމުން، މި މައްސަލައިގެ ޝަރީޢަތް ކްރިމިނަލް ކޯޓުން ކުރިއަށް ގެންދަންޖެހޭނެ ކަމަށް މައްސަލަ ބެއްލެވި ތިން ފަނޑިޔާރުންގެ އިއްތިފާޤުން ނިންމާފައިވެއެވެ.
ކުރިން މި މައްސަލައާ ގުޅިގެން ހައިކޯޓުން ދެ ފަހަރެއްގެ މަތިން މައްސަލަ ބޭރުކޮށްލާފައިވީ ނަމަވެސް، ފަހުން މައްސަލަ މުރާޖަޢާކުރުމަށްފަހު ބަލައިގަނެފައިވެއެވެ.
މިހާރު ޖިހާދު ހުންނެވީ މޯލްޑިވްސް އިންޓަނޭޝަނަލް ފައިނޭންޝަލް ސާވިސް އޮތޯރިޓީގެ ޗެއާމަންގެ މަޤާމުގައެވެ.
