ދެކުނު އޭޝިއާގެ އެންމެ ބާރުގަދަ ޕާސްޕޯޓުގެ މަޤާމު މިއަހަރުވެސް ރާއްޖެއަށް

ދެކުނު އޭޝިއާގެ އެންމެ ބާރުގަދަ ޕާސްޕޯޓުގެ މަޤާމު މި އަހަރުވެސް ދިވެހިރާއްޖެއަށް ލިބިއްޖެއެވެ.

ހެންލީ ޕާސްޕޯޓް އިންޑެކްސް އިން ބަލަނީ ވިސާއަކާ ނުލައި އެންމެ ގިނަ ޤައުމުތަކަށް ދަތުރުކުރެވޭ ޕާސްޕޯޓުތަކަށެވެ. އެގޮތުން ދިވެހިރާއްޖޭގެ ޕާސްޕޯޓު ބޭނުންކޮށްގެން 94 ޤައުމަކަށް ވިސާއަކާ ނުލައި ދަތުރުކުރެވޭނެއެވެ. ނުވަތަ އެ ޤައުމަކަށް ޒިޔާރަތްކުރުމުން އޮން-އެރައިވަލް ވިސާ ލިބިގެންދާނެއެވެ.

މުޅި ދުނިޔޭގެ ލިސްޓުގައި ދިވެހިރާއްޖެ އޮތީ 53 ވަނައިގައެވެ. މިއީ މިދިޔަ އަހަރާ އަޅާބަލާއިރު އެއް ދަރަޖަ ދަށްވެފައިވާ މިންވަރެކެވެ. ނަމަވެސް، ދެކުނު އޭޝިއާގެ ސަރަޙައްދުގައި ދިވެހިރާއްޖެ ދަނީ އެންމެ މަތީ މަޤާމު ހިފަހައްޓަމުންނެވެ.

މި ސަރަޙައްދުން ދިވެހިރާއްޖެއާ އެންމެ ގާތުން ވާދަކުރި ޤައުމަކީ އިންޑިއާއެވެ. އިންޑިއާ ޕާސްޕޯޓު ބޭނުންކޮށްގެން ވިސާއަކާ ނުލައި 57 ޤައުމަކަށް ދަތުރުކުރެވޭއިރު، އެ ޤައުމު އޮތީ ދުނިޔޭގެ ލިސްޓުގެ 85 ވަނައިގައެވެ.