ކާން ދިނުމުގެ ރޮނގުގައި ރާއްޖޭގެ މަޝްހޫރުކަން ހޯދާފައިވާ ވިޔަފާރިޔާ މުޙައްމަދު ތައުފީޤް (ސައުތު ތައުފީގު) މަރާލަން އުޅުނު ކަމަށާއި، އަދި އޭނާގެ ވިޔަފާރި "ފުނޑާލަން" ޔާމީނުގެ ސަރުކާރުން މަސައްކަތް ކުރި ކަމަށް ބުނެ ބޮޑެތި ތުހުމަތުތަކެއް ކޮށްފިއެވެ.
ވަރަށް ގިނަ އަހަރުތަކެއް ވަންދެން ސަރުކާރުގެ ވަރަށް ގިނަ ތަންތަނަށް ކާތަކެތި ފޯރުކޮށްދިނީ އޭނާގެ ކުންފުނިންނެވެ. އޭގެތެރޭގައި ޕޮލިހާއި، ސިފައިންގެއާއި، މިނިސްޓްރީތަކުގެ އިތުރުން ޖަލުތައް ވެސް ހިމެނެއެވެ.
Advertisement
ސައުތު ތައުފީޤް ވިދާޅުވީ ޕީޕީއެމްގެ ވެރިކަމުގައި ޕާޓީތަކަށް ސައި ހަދާއިރު ބިލް ކުރަން ޖެހޭނީ ބޮލަކަށް 500 ރުފިޔާގެ ރޭޓުން ކަމަށާއި އޭގެއިން 120 ރުފިޔާގެ ރޭޓުން. ނެގުމަށްފަހު ބާކީ ބައި ވަކި މީހަކާއި ޙަވާލުކުރަން އެންގި ކަމަށް. ނަމަވެސް އެކަމަށް އޭނާ އެއްބަސް ނުވާކަމަށް ވިދާޅުވި.
ތައުފީގު ވިދާޅުވީ އޭނާ ބިޑްތައް ކާމިޔާބު ކުރައްވަނީ ވަރަށް ކުޑަ އަގެއް ޖަހައިގެން ކަމަށާއި މިވީހާ ތަނުގައި ޚިދުމަތް ފޯރުކޮށްދިނީ ވަރަށް ކުޑަ އަގެއް ހުށަހަޅައިގެންނެވެ. ނަމަވެސް ޔާމީނުގެ ވެރިކަމުގައި އޭނާ ލައްވައި ޚިޔާނާތް ހިންގުމަށް މަސައްކަތް ކުރި ކަމަށާއި އެކަމަށް ފުރުސަތު ނުދިނުމުން އޭނާގެ ވިޔަފާރި "ފުނޑާލައި" އެންމެ ފަހުން ފުރާނަ ސަލާމަތްކުރުމަށް ގައުމު ދޫކުރައްވައި ބޭރަށް ދާން ޖެހުނު ކަމަށް ވިދާޅުވިއެވެ.
“ޙަޤީޤަތުގަ މިހިސާބަށް މިކަންތައް އަންނަން ޖެހުނު އެންމެ ބޮޑު ސަބަބަކަށް ވަނީ ޔާމީނުގެ ވެރިކަމުގަ… 2 އަހަރާއި 6 މަސްފަހުން އަޅުގަނޑު ގެންގުޅޭ ހާއްސަ މުވައްޒަފުން ކައިރީގައި .. ގުޅާފަ ބުނީ ކުރިޔަށް އޮތްތަނާގައި ތިބޭފުޅުން ޕާޓީ ހައްދަވަން ވާނީ (ޕާޓީތަކަށް ސައި ދިނުމުގައި ބިލްކުރަން ޖެހޭނީ) ބޮލަކަށް 500 ރުފިޔާއަށޭ. ދެން ތައުފީގު ނަގާށޭ 120 ރުފިޔާގެ ރޭޓުން. ބާކީ ލާރި ތިމަންނަމެންނާއި ހަވާލުކުރާށޭ."
ތައުފީގު ވިދާޅުވީ އެކަމާއި އޭނާ އެއްބަސް ނުވާ ކަމަށެވެ. އަދި ޔާމީނު ވެސް ނުވަތަ މެޑަމް ފާތުން ވެސް އެފަދަ އެއްޗެއް ވިދާޅުވާނެހެން ހިއެއް ނުވާ ކަމަށް އެމީހުންނަށް ދެންނެވި ކަމަށް ވެސް ތައުފީގު ވިދާޅުވިއެވެ.
ތައުފީގު ވިދާޅުވީ އޭނާ އެކަމާއި އެއްބަސް ނުވުމުން އޭގެ ފަހުން ދެމަސް ވެސް ނުވަނީސް މާފުށީ ޖަލާއި ހިންމަފުށީ ޖަލަށް ކޮއްތު ގެންދިޔުން އޭނާގެ އަތުން އަތުލައިފައިވާ ކަމަށެވެ. އަދި މާލޭގައި ގެންގުޅޭ ޖަލުތައް އަތުލައިފި ކަމަށާއި އެކަމުގެ އަސްލު ސަބަބަކީ ކުޑަ އަގަކަށް ބިލްކުރުމުގެ ބަދަލުގައި އިންވޮއިސްތަކުގައި އެތައް ގުނަ ބޮޑު އަގު ޖަހައި އިތުރުވާ ފައިސާ ސަރުކާރުގެ ވަކި ބަޔަކަށް ދިނުމަށް އެންގުމުން އެކަންތައް ކުރުމަށް އޭނާ ދެކޮޅު ހެދުމެވެ.
"އަޅުގަނޑު ރައީސަށް (އޭރުގެ ރައީސް ޔާމީނަށް) މެސެޖު ކޮށްފިން، މެޑަމް އަށް މެސެޖް ކޮށްފިން ކޮބާތޯއޭ ކުށަކީ؟" ސައުތު ތައުފީގު ވިދާޅުވީ މެޑަމް އާއި ޔާމީނަކީ ބޭނުން ގަޑިއެއްގައި ފޯނު ވެސް ކުރެވޭ ބައެއް ކަމަށާއި ނަމަވެސް އެގެފަހުން ފޯނަށް ޖަވާބުދިނުން ހުއްޓާލައި މެސެޖުތަކަށް ރިޕްލައި ވެސް ނުކުރާ ކަމަށެވެ. އަދި ޕާޓީ އޮފީހަށް ހިލޭ ފޮނުވާ ކާއެއްޗެހި ވެސް މަނާ ކުރި ކަމަށް އޭނާ ވިދާޅުވިއެވެ.
"ދެން އަޅުގަނޑަށް އަންގައިފި ޕާޓީ އޮފީހަށް ވެސް ކާއެއްޗެހި ފޮނުވައިގެން ނުވާނެ ކަމަށް. އެވެސް އަޅުގަނޑު ހިލޭ ފޮނުވާ އެއްޗެހި ހުރިހާ ގަޑިޔަކަށް ވެސް. އަޅުގަނޑަށް ވިސްނިއްޖެ ދެން ކޮންމެވެސް ކަހަލަ ވަރަށް ބޮޑު ގޯހެއް ހިނގައިފިކަން"
ތައުފީގު ވިދާޅުވީ އޭނާގެ ފުރާނައަށް ވެސް ނުރައްކަލުގެ އިންޒާރުގެ މަޢުލޫމާތު ލިބުނު ކަމަށެވެ. ސަރުކާރުގެ ތެރޭގައި އޭނާގެ ގާތް މީހުން ތިބި ކަމަށާއި އެމީހުން އޭނާއަށް ލަފާދިނީ ރާއްޖެ ދޫކޮށް ދިޔުން ކަމަށް ވެސް ވިދާޅުވިއެވެ. އެހެންވެ ރާއްޖެ ދޫކޮށް ބޭރަށް ދާން ޖެހުނު ކަމަށް ވެސް ތައުފީގު ވިދާޅުވިއެވެ.
"ކަލޭގެ ފުރާނަ ހިއެއްނުވޭ ސަލާމަތް ވާނެހެން. ހީވީމަ އަޅުގަނޑު ފުރައިގެން ދިޔައީ ރާއްޖެއިން ބޭރަށް. ދެން އެމްޑީޕީ ވެރިކަން ލިބުނީމަ މާލެ އައީ" ސަރުކާރުގެ އިސް ބަޔަކު ބުނި ކަމަށް ތައުފީގު ވިދާޅުވިއެވެ.
