ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދޫ އަތޮޅުގެ ބައެއް ރަށްތަކަށް ކުރައްވާ ތިން ދުވަހުގެ ދަތުރުފުޅުގެ މިއަދު ގދ. ރަތަފަންދޫއަށް ވަޑައިގެންނެވުމުން އެރަށު ރައްޔިތުން ނުކުމެ އެމަނިކުފާނަށް ރަތް ދޫލައިގެ މަރުޙަބާއެއް ކިޔައިފިއެވެ.
ރައީސްގެ މި ޒިޔާރަތާއި ގުޅިގެން، ރަތަފަންދޫ ބަނދަރު ސަރަޙައްދުގައި ގިނަ ޢަދަދެއްގެ ރައްޔިތުން އެއްވެފައިވާއިރު، މަގުތައް ޒީނަތްތެރިކޮށް، ރަށުގެ އެކި ސަރަޙައްދުތަކުގައި ދިދަތައް ޖަހާފައިވާކަން ފާހަގަކުރެވެއެވެ.
ރަތަފަންދޫގައި ޚާއްޞަ ޖަލްސާއެއް ބޭއްވުމަށް ހަމަޖެހިފައިވާއިރު އެ ޖަލްސާ ދައުލަތުގެ މީޑިއާއިން ވަގުތުން ދުރަށް ދައްކާނެއެވެ.
Advertisement
ރައީސްގެ މި ދަތުރުފުޅުން ހުވަދު އަތޮޅުގެ ރައްޔިތުންގެ ކަންބޮޑުވުންތަކާއި އުންމީދުތައް ސަރުކާރާއި ހަމައަށް ގެނެވި، ރަށްރަށުގެ ތަރައްޤީއަށް އިތުރު ބާރެއް ލިބިގެންދާނެއެވެ.
ރައީސުލްޖުމްހޫރިއްޔާ މިއަދު ރަތަފަންދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިތުރުން ރަށުގެ ރައްޔިތުންނާއި ބައްދަލުކުރެއްވުމަށް ހަމަޖެހިފައިވެއެވެ.
ހުވަދުއަތޮޅުން ދެކުނުބުރިއަށްފަހު ދެން އެމަނިކުފާނު ވަޑައިގަންނަވާނީ ހުވަދުއަތޮޅު އުތުރުބުރީގެ ރަށްތަކަށެވެ. އެގޮތުން ފުރަތަމަ ވަޑައިގަންނަވާނީ ކަނޑުހުޅުދޫ އަށެވެ. އެއަށްފަހު ދެން ވަޑައިގަންނަވާނީ ނިލަންދޫ، މާމެންދޫ އަދި ދެއްވަދޫއަށެވެ.
