ރައީސުލްޖުމްހޫރިއްޔާ ޑރ. މުޙައްމަދުނމުޢިއްޒު ހުވަދުއަތޮޅަށް ކުރައްވަމުންދާ ދަތުރުފުޅުގެ ތެރެއިން މިއަދު ފިޔޯރީއަށް ވަޑައިގަތުމާއި ގުޅިގެން، އެރަށުގެ ތަރައްޤީއަށް ބޭނުންވާ ގިނަ ކަންތައްތަކެއް ކޮށްދެއްވުމަށް ރަށުގެ ރައްޔިތުން އެދިވަޑައިގެންފިއެވެ.
ފިޔޯރީ ވޮލީ ކޯޓުގައި ބޭއްވުނު ޚާއްސަ ޖަލްސާގައި ފަރެސްމާތޮޑާ ކައުންސިލްގެ ނައިބު ރައީސާ އައިމިނަތު އައިވީނާ ވިދާޅުވި ގޮތުގައި، ރަށުގެ ރައްޔިތުން އެދިވަޑައިގަތް ކަންތައްތަކުގެ ތެރޭގައި ރޯހައުސްތަކެއް އަޅައިދިނުމާއި ލޯނު ދޫކުރުން ހިމެނެއެވެ. މީގެ އިތުރުން، ރަށަށް ބޭނުންވާ 2 ޖަނަރޭޓަރު ހޯދައިދިނުމަށް ވެސް ވަރަށް އާދޭހާއެކު އެދިވަޑައިގަތެވެ.
ރަށުގެ އިޤްތިޞާދީ ދުވެލި އިތުރުކުރުމަށްޓަކައި، މިހާރު ހުއްޓިފައިވާ އޭޓީއެމްގެ މަސައްކަތް އަލުން ފަށައި، އެ ޚިދުމަތް ދިނުމަށް ވެސް ރައްޔިތުން އެދިވަޑައިގަތެވެ. އަދި ހަމައެހެންމެ، މަސައްކަތް ހުއްޓިފައިވާ ފިޔޯރީ ބަނދަރާއި ނެރުގެ މަސައްކަތް ނިންމައިދިނުމަށް ވެސް އެދިވަޑައިގަތެވެ.
Advertisement
ޞިއްޙީ ދާއިރާއަށް ބަލާއިރު، ފިޔޯރީ ސިއްޙީ މަރުކަޒަކީ ލިޔެކިޔުމުގައި 24 ގަޑިއިރު ޚިދުމަތްދޭ ތަނެއްކަމުގައި ވީނަމަވެސް، ޑޮކްޓަރުންނާއި މެޝިނަރީ ނެތުމުގެ ސަބަބުން އެކަން ޢަމަލީގޮތުން ކުރިއަށް ނުދާކަން ފާހަގަކޮށް، މިކަން ޙައްލުކޮށްދިނުމަށް ވެސް އެދިވަޑައިގަތެވެ.
މީގެ އިތުރުން، ކުޅިވަރުގެ ދާއިރާ ކުރިއެރުވުމަށްޓަކައި ފުޓުބޯޅަ ދަނޑަކާއި ވޮލީ ކޯޓެއް ޤާއިމުކޮށްދިނުމަށާއި، ތިމާވެށި ރައްކާތެރިކުރުމަށްޓަކައި ކުނި ނައްތާލާ ސެންޓަރަށް ބޭނުންވާ މެޝިނަރީތައް ހޯދައިދިނުމަށް ވެސް އެދިވަޑައިގަތެވެ.
ފިޔޯރީގެ ރައްޔިތުން ބޭނުންވާ ކަންތައްތަކުގެ ތަފްޞީލީ ލިޔުމެއް ރައީސަށް އަރުވާނެ ކަމަށް ވެސް އައިމިނަތު އައިވީނާ ވިދާޅުވިއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި ހުވަދުއަތޮޅުގެ އެކި ރަށްރަށަށް ޒިޔާރަތްކުރައްވަމުން ގެންދަވާއިރު، މިވަގުތު ހުންނެވީ ފިޔޯރީގައެވެ.
