ރައީސުލްޖުމްހޫރިއްޔާ ގދ. ވާދޫގައި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ހުވަދުއަތޮޅަށް ކުރައްވާ ތިން ދުވަހުގެ ދަތުރުފުޅުގައި ދާދި ދެންމެއަކު ގދ. ވާދޫއަށް ވަޑައިގެންފިއެވެ.

މިއަދު މިހާތަނަށް ހޯނޑެއްދޫއާއި ނަޑެއްލާއަށް ވަޑައިގެންފައިވާއިރު، މި ދަތުރުފުޅުގައި ރައީސް ވަޑައިގަންނަވާނީ ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށެވެ. ހުވަދުއަތޮޅު ދެކުނުބުރިން ރައީސް ވާދޫ އަށްފަހު ރައީސް ވަޑައިގަންނަވާނީ، ފިޔޯރީ އަދި ރަތަފަންދޫއަށެވެ.

ވާދޫއަށް ވަޑައިގަތުމަށްފަހު ރައީސް އެ ރަށުގެ ރައްޔިތުންނާ ބައްދަލުކުރައްވައި، ރަށުގެ ހާލާއި ރައްޔިތުންގެ ބޭނުންތަކާއި ބެހޭގޮތުން މަޢުލޫމާތު ހޯއްދަވާނެ ކަމަށް ރައީސް އޮފީހުން މަޢުލޫމާތު ދީފައި ވެއެވެ.

ރައީސްގެ މި ދަތުރުފުޅުގައި މިއަދު އެންމެ ފުރަތަމަ ވަޑައިގެންނެވި ގދ. ހޯނޑެއްދޫގެ ފެނާއި ނަރުދަމާ ނިޒާމުގެ ޚިދުމަތް ފެށުމުގެ ރަސްމިއްޔާތު ޝަރަފުވެރިކޮށްދެއްވިއިރު އެރަށުގެ ތަރައްޤީއަށް ގިނަ ކަންތައްތަކެއް ކޮށްދެއްވާމެ ކަމަށް ވިދާޅުވިއެވެ.

މީގެ އިތުރުން ދެން ވަޑައިގެންނެވި ނަޑެއްލާގައި ޒަމާނަށް ފެތޭ ބަނދަރެއް ހައްދަވައިދެއްވާނެ ކަމަށް ވިދާޅުވެ އެރަށަށް ވެސް ގިނަ ވަޢުދުތަކެއް ވެވަޑައިގެންނެވިއެވެ.

^{ނަޑެއްލާގެ ރައްޔިތުންނަށް ވެފައިވާ ވަޢުދުތައް ތިރީގައިވާ ލިންކުން ވިދާޅުވެލައްވާ.}